Олимпиаданы грек-рим тутушуудан эки кере чемпиону, дунияны юч кере чемпиону Роман Власов, Олимпиаданы призёру, эркин тутушуудан Европаны юч кере чемпиону Аниуар Гедуев бла Олимпиаданы дзюдодан призёру, Россейни жыйымдыкъ командасыны баш тренери Хасанби Таов Чегем районну грек-рим тутушуудан спорт школунда болгъандыла. Аланы биргелерине республиканы Парламентини вице-спикери Мурат Карданов, спорт министр Ислам Хасанов баргъандыла.

Айтхылыкъ гёжефле жаш спортчулагъа жарау этдиргендиле, сора ала бла къауумлагъа юлешинип, регбиболдан шуёхлукъ эришиуле къурагъандыла. Ызы бла муниципалитетни администрациясында жаш тёлю ла тюбешиу болгъанды. Аны кезиуюнде Роман Власов бла Аниуар Гедуев спортда  жолларыны, хорламларыны, ата-аналарыны бла юйретиучюлерини, жууукъ заманнга муратларыны юслеринден айтхандыла. Сабийле уа, чемпионлагъа соруула бере, аланы кёп заманны иймезге сюйгендиле.

Ахырында олимпиецле Чегем районда къырал, халкъла аралы даражалада тутушурча кючлю гёжефлени хазырларгъа битеу онгла болгъанларын чертгендиле.

Кульчаланы Зульфия.