Шимал Кавказстатны эсеплерине кёре, быйыл Къабарты-Малкъарда сабанлыкълагъа бёлюннген жерлени уллулугъу 281,8 минг гектаргъа жетгенди. Былтыр бла тенглешдиргенде,  ол  0,7 процентге кёпдю. 

Саулай алып айтханда, мюлкледе чеплеу 20,7 минг гектарда ёсдюрюлгенди. Ол былтырдан  50 процент чакълыгъа асламды.  Аны бла бирге тахта кёгетле да иги кесек жерде салыннгандыла. Бахчаланы барында да бу битимлеге  16,8 минг гектар бёлюннгенди, ол да озгъан жылдан 9 процентге асламды.

Картофну юсюнден айтханда,  ол  7 минг гектарны алады эм  былтыргъы кёрюмдюден артыкъ тюрленмегенди. Къылкъылыла да 205 минг гектарда орулгъандыла.  Нартюх да,  былтырча, 137,5 минг гектарда  ёседи. Болсада арендаторла былтырдан эсе  бай тирлик алыр муратлыдыла. Эсге сала айтсакъ, бусагъатда аны татлы тюрлюсюн оруп бошай турадыла.  

КъМР-ни Эл мюлк министерствосундан билдиргенлерича, бюгюнлюккде мюлклени асламысы  тирликни жыйып кюрешедиле. Эм тириле   уа кюзлюклени  къайгъысын этип башлагъандыла. 

 Кезиулю ишле болжалларындан кеч къалмай бардырылыр ючюн материал эм техника жаны бла да тыйгъыч жокъду.

Магометланы Сулейман.