Орта кюн КъМКъУ-ну аллында, шёндюгюлю излемлеге кёре тапландырылгъан скверде, Нальчик шахарны администрациясы бла вуз къурап, Украинада бардырылгъан энчи операциягъа болушлукъгъа деп, жаш тёлюню къатышыуу бла митинг ётгенди. Анга россейли студентле бла бирге бизни къырал университетде билим алгъан тыш къыраллы жашла бла къызла да къатышхандыла. 
Жыйылыуну ачаргъа сёз шахар администрацияны таматасыны орунбасары Тимур Хуровха берилгенди. Жаш тёлюню аллында сёлеше, ол битеу жыйылгъанланы КъМР-ни 100-жыллыгъы бла алгъышлагъанды. 
- Бюгюнлюкде республиканы бла Нальчикни администрациясыны таматалары шахарыбыз ариу эм адамла заманларын зауукълу ётдюрюрча болурун баш борчладан бирине санап, 7 жерде быллай скверле къурагъандыла. Къыралда болумну юсюнден айта, Президент Владимир Путин бардыргъан ызгъа тюз кёзден къарагъаныбызны билдиребиз. Къайда да кюч бирлик болгъан жердеди да, барыгъызны да къырал башчыны политика ызына билеклик этерге чакъырама, - дегенди Тимур Владимирович.   
Андан сора жаш къауумну аллында «Единая Россия» политика партияны келечиси, КъМР-ни халкъ артисти Текуланы Амур да сёлешип, Украинада бардырылгъан операциягъа кёз къарамын билдиргенди. 
- Мен былайда бир затха энчи эс бёлюрге сюеме. Россей Украинаны халкъы бла уруш этмейди. Биз андагъы миллетчиликни ызын тутуп, кеслери сюймегенлеге зарауатлыкъ жетдирген къауумла бла уруш бардырабыз. Бизни аталарыбыз бла аппаларыбыз дунияда фашизмни къурутханла болгъанларын бир заманда да унутмазгъа керекбиз. Къырал таматабызны политикасы саулайда дунияда аллай кюйсюзлюкге сый бергенле бла уруш этиудю да, ол муратына жетеригине ийнанама, - дегенди Теку улу. 
КъМКъУ-ну жаш тёлюсюню атындан Студент биригиуле эм жаш тёлю программалагъа бла проектлеге болушлукъ этиу араны таматасыны орунбасары Елизавета Хуторская сёлешгенди. Ол шёндю вузну Элбрус посёлкада орналгъан солуу базасында Донецкден келген сабийле солуп кетгенлерин билдиргенди. 
- Бу жаз мында «Университетские смены» федерал программа бла 200 чакълы сабийни солур онглары болгъанды. Биз да тёрели къонакъбайлыгъыбызны кёргюзтюр ючюн артха къалмагъанбыз. Аланы араларында кёпле бери къайтып келип, бизни вузгъа кирирге сюйгенлерин да айтхандыла, - деп билдиргенди ол.
Сёлешгенлени араларында КъМР-ни Жамауат палатасыны Коммерциялы болмагъан организацияларыны таматасы Юлия Ордокова эм Индиядан келип окъугъанла да болгъандыла. 
Юлия Валерьевна 2014 эм 2016 жыллада Донецкге баргъанындан жыйылгъанлагъа хапар айтханды. 
- Анда жашагъанланы къаллай мудах кёзлери болгъанларын кёпле билмейдиле. Ала уллу да сёлешмейдиле. Балет труппаны мында гастрольларын къурагъан эдик. Ала биргелерине сабийлени да келтирген эдиле. Сизни адамларыгъызны бетлери ышарыпдыла дегенлери уа бюгюн да эсимдеди. Аны себепли къырал таматабыз тутхан ызны тюзге санайма эм башланнган ишни ахырына жетдирирге керекли сунама, - деп чертгенди ол. 
Ахырында жаш тёлю байракъла бла суратлагъа тюшгендиле. 
 

Къасымланы Аминат.