Кёп болмай Регионнга оноу этиу арада КъМР-ни энергетика, тарифле эмда жашау журтлагъа надзор этиу жаны бла  къырал комитетини таматасыны къуллугъун толтургъан  Алим Макуашев бла  тюзюнлей эфир болгъанды.  Ол жангы тюрлениулени, бюгюнлюкде жамауатны жарсытхан  проблемаланы юсюнден хапарлагъанды эм тынгылаучуланы  сорууларына да жууап бергенди. 

Алим Ажгериевич, сизге кёпле къаллай соруула бла келедиле?

Сёз ючюн, юйге оноу этген компания (УК) неда жашау журтну товариществосу (ТСЖ) кеслерини тюзюнлей борчларын толтурмасала. Бир тюрлю жумуш ючюн инсаннга берилген  квитанция иги окъулмаса,   тариф кёп, не аз жазылгъанына ишекли болгъан.  Аны бла бирге жашау журт-коммунал мюлк жумушла тынгылы толтурулурча,    ишле ючюн фондха, ремонт ишлеге, налоглагъа эм башха затлагъа да заманында тёлерге керекди.   
Индексация къалай тюрлю къуралады эм тарифлени юсюнден да айтсагъыз эди?

Саулай алып айтханда, бюгюнлюкде  Къабарты-Малкъарда  тарифле РФ-ни Правитекльствосу бла регионну Башчысы белгилеген индексге толусунлай келишедиле эм регионла бла тенглешдиргенде эм гитчеледен биридиле.  Сёз ючюн, къоншу Къарачай-Черкес бла Шимал Осетияда электрокюч ючюн 4 сом бла 45 копейка  тёлей эселе бизде ол отуз копекге азды.

 Оноу этиу компания бла келиширге керекмиди эм биринчиден неге эс бурургъа тийишлиди?

Кёп фатарлы юйге оноу этген компанияны сайтында къаллай ишле тамамланнганлары эм келир заманда къайсыла  этилликлери да белгили болургъа кёредиле. Юйню тийреси тазаланмагъанына да къарамай, аны ючюн тёлерге керекмиди деген  соруу кёплени жарсытады. Болсада аны ючюн тёлерге тюшерикди, алай хар адам закон бла  кесини правосун къорууларгъа эркиндиле.  Анга кёре, юйде жашагъанла ол неда бу жумуш этилмегине акт жарашдырып   билдириге керекдиле. Сёз ючюн, арбаз жыйлмагъаны, лифтлеге неда башха мюлкге  тнгылы къаралмагъанын белгилерге тийишлиди.  Андан сора ала оноу этген компаниягъа перерасчет этерча билдирирге боллукъдула.
Тюзюнлей  эфирде тынгылаучуладан эм оноу этген компанияланы келечилеринден да кёп тюрлю соруу берилгенди.  Ведомствону таматасы аланы барына да тынгылы жууап берирге кюрешгенди.