- Биз Президентни буйругъу бла жарашдырылгъан программабызны толтуруп быйыл башлагъанбыз да, 1000 школгъа тынгылы ремонт этилгени аны биринчи жетишимиди. Жангыртылгъан школла - жаланда башларын, терезелерин алышындырыу эмда къабыргъаларын омакъландырыу тюйюлдю, ол сабийлеге окъургъа жангы онгла да бериудю – спорт секцияла, театр кружокла, классдан тышында дерслеге отоула да къурауду. Бек башы уа – ала заманны бла жаш тёлюню излемлерине бла сейирлерине келишген мекямла боллукъдула, - дегенди «Единая Россияны» халкъ программасыны билим бериу эм илму жаны бла координатору, Къырал Думаны жарыкъландырыу жаны бла комитетини таматасы Ольга Казакова.

Школлагъа тынгылы ремонт этиуге партия бла тийишли министерство регионлада бла федерал даражада къурагъан жамауат штабла кёз-къулакъ болгъанлай турадыла. Хар объектге партиядан депутатла бла сенаторла жууаплы болурча этилгенди. Бу ишге устазла, ата-анала, школчула кеслери да къатышадыла.

Регионланы асламысы тынгылы ремонт этиуню планын августха окъуна толтургъан эдиле. Сёз ючюн, Къарачай-Черкесде программа 23 школда бардырылады. Быйыл 18-синде ремонт ишле бошаладыла, беш мекямны уа 2023 жылда хайырланыргъа берликдиле.

Бизни республикада уа, Къырал Думаны Къабарты-Малкъардан депутаты Виктория Родина билдиргеннге кёре, 2022-2023 жыллада халкъ программаны хайырындан 10 школ ишленнгенди, 29-суна уа тынгы ремонт этилгенди. Быйылны ахырына Нарткъалада, Прохладныйде бла Куба элде 1785 окъуу жери боллукъ 3 жангы мектепни къурулушларын бошаргъа белгиленеди. Къалгъан жетиси уа (4539 окъуу жер) келир жылны ахырында хайырланыргъа берилликдиле.

Тынгылы ремонтну чеклеринде инженер ызла, мекямланы башлары, терезелери, эшиклери, поллары, ич отоулары жангыртыладыла, школла жангы оборудование бла жалчытылынадыла, аланы тийрелери да тап халгъа келтириледиле.

-Битеу ол ишлеге КъМР-ни Башчысы, «Единая Россия» партияны Къабарты-Малкъарда регион бёлюмюню секретары Казбек Коков кеси кёз-къулакъ болгъанлай турады. Контроль этиуге депутатла, тийишли министерствола, жер-жерли самоуправленияны органлары, ата-анала, школчула кеслери, жамауат да тири къатышадыла. Битеу ишле да техника излемледен эмда тохташдырылгъан болжалладан таймай тамамланадыла, - дегенди Виктория Родина.