Кёп болмай «Новосибирск-Экспоцентр» кёрмюч комплексде Россейде илму-технология ыйыкъны чеклеринде «Технопром-2022» деген IX халкъла аралы форум ётгенди. Анга жыйырмадан аслам къыралдан онбир минг чакълы адам, ол санда Къабарты-Малкъар къырал университетни миллет технология башламчылыкъла эм тохтаусуз билим бериу департаментини специалистлери да къатышхандыла.

Форумну ачылыууна РФ-ни Правительствосуну Председателини орунбасары Дмитрий Чернышенко, илму эм бийик билим бериу министр Валерий Фальков, Сибирь федерал округда Президентни толу эркинликли келечиси Анатолий Серышев, Новосибирск областьны губернатору Андрей Травников да къатышхандыла.

– Форумну эсеплерине кёре, къыралны экономикасын эм илму-техника бёлюмюн айнытырча къыйматлы башламчылыкъ бла проектле сюзюлюрле деп бек ышанама, – дегенди Дмитрий Чернышенко.

Конференцияны хайыры бла миллет илму эм промышленность инфраструктураны айнытыргъа, импортну алышындырыуда эм экономиканы айнытыуда да магъаналы борчланы толтурургъа онг барды. «Технопром» форумну чеклеринде илмуну, власть органланы, айнытыу институтланы, къырал корпорацияланы эм башха бёлюмлени да келечилери бирге тюберге эм байламлыкъ къураргъа онг табадыла.

Форумну кезиуюнде «Точка кипения» араланы регионла аралы слёту да бардырылгъанды. Аны чеклеринде Новосибирск бла Къабарты-Малкъар къырал университетлени миллет технологияла эм тохтаусуз билим бериу департаментлерини таматалары Анна Коновалова бла Юрий Ашинов къыралны «Точка кипения» араларыны сервислерин бирикдириуню, кооперацияла къурауну, билим бериуге эм предпринимательлеге себеплик этиу жаны бла да сорууланы сюзгендиле.