Геуюрге кюн «Гладиатор» спорт комплексде Олимпиада оюнланы эки кере чемпиону, дунияны эм Европаны чемпиону Роман Власов Олимпиада оюнланы призёру, спортну сыйлы устасы Аниуар Гедуев бла бирге жаш спортчулагъа мастер-класс бардыргъандыла. Ол тюбешиуге Къабарты-Малкъарны спорт министри Хасанланы Ислам, Олимпиада оюнланы чемпиону, КъМР-ни Парламентини Председателини орунбасары Мурат Карданов, шахарладан бла районладан гёжефле къатышхандыла. Бу жумуш КъМР-ни 100-жыллыгъына жораланып бардырылгъанды.

Жыйылыуну ача, министр Хасанланы Ислам, быллай тюбешиулени жаш тёлюге магъаналары уллу болгъанын чертгенди. «Роман Власовча айтхылыкъ спортчуну юйретиулерине къатышыу, ол къытхан сыйлы майдалланы къолда тутуу хар гёжефге да, сёзсюз, эсде къаллыкъ ишди. Ол кеси жарау этгенде хайырланнган амалланы кёрюу, ахшы дерсди деп, мен алай оюм этеме», – дегенди.

– Мен, узакъ 2010 жылда, уллу спортха жолуму мында, Нальчик шахарда, башлагъан эдим. Ол манга бек ахшы атлам болгъан эди. Юниорланы араларында биринчи болуп, кесими къарыууму кёргюзтген эдим. Ма бу жол да манга мында болмагъанча иги тюбегендиле. Сау болсунла! – дегенди белгили спортчу Роман Власов.

Ары келгенлеге деп, концерт программа да къуралгъан эди. Жырчы Жаникаланы Эльдар, «Шагди» сабий тепсеу ансамбль эм башхала къонакъны миллет жырла эм тепсеуле бла шыгъырей этгендиле.

Роман Власов саугъалада келтиргенди – Олимпиадада къытхан эки майдалын алып келгенди.

– Сабий заманымда айтхылыкъ Александр Карелин бла тюбешиуге тюшген эдим. Анда ол бизге кесини алтын майдалын кёргюзтгени эсимдеди. Анга къолум бла тийген кюнюмден башлап чемпион болургъа итиннгенме. Къысхасын айтханда, бюгюннгю болумум ол тюбешиу бла къаты байламлыды, – дегенди къонакъ.

Андан сора да, Роман Власов Бахсан шахарны спортчуларына, Аниуар Гедуев а Черек районну спорт школуна тутушуу кюйюзле саугъалагъандыла. Мурат Карданов да, быллай жумушдан тышында къалмай, Нальчик шахарны спорт школуна кюйюз бергенди.

Ызы бла гёжефле мастер-классларын бардыргъандыла. Тутушууну грек-рим тюрлюсю бла кюрешгенлени Роман Власов юйретгенди, эркин тутушууда хайырланылгъан амалла бла уа жаш спортчуланы Аниуар Гедуев шагъырей этгенди.

Тюбешиуню ахырында сабийле къонакъла бла суратха тюшгендиле, аланы къол ызлары бла саугъала да алгъандыла.