Туризмни шёндюгюлю инфраструктурасын къурау, солугъанланы жумушларын бийик даражада тамамлау, турланы алыргъа россейлилени барысыны да къолларындан келирча этиу – быллай эм башха борчла къыралда туризмни 2035 жылгъа дери айнытыуну программасына киредиле. Аны толтурууну юсюнден буйрукъгъа Россейни Правительствосуну башчысы Михаил Мишустин къол салгъанды, деп билдиредиле республиканы Курортла эм туризм министерствосундан.

Планнга тюрлю-тюрлю жумушладан 65-ден асламы, туризмге къыралны жанындан болушлукъ этиу мадарланы талайы да киредиле. Аланы араларында регионлагъа турист кластерлерин игилендириуге ахча бёлюу, инфраструктураны къурау жаны бла инвестиция проектлеге льгота кредитование, къонакъ юйлени ишлеуге бла жангыртыугъа грантла бериу, эл эм экология солууну айнытыугъа себеплик этиу дегенча мадарла да бардыла. Модуль къонакъ юйле бла кемпингле ишлеуге, турист оборудованияны чыгъарыугъа бла къол усталыкъла жаны бла производствола къураугъа да къараллыкъды.

Маданият-жарыкъландырыу туризмни айнытыр муратда культура мекямлагъа ремонт этилликди, жангы кёрмючле къураллыкъдыла, эрттегили шахарланы тарых араларын айбатландырыугъа да эс буруллукъду. Музейледе экспонатла бла шагъырейленирча мультимедиагидле боллукъдула. Бу бёлюмню цифра жаны бла айныууна энчи магъана бериледи. Анга кёре путёвкаланы алыуну бир системасы жарашдырыллыкъды, Миллет турист порталда уа жангы сервисле ишлеп башларыкъдыла.