Гъэсыныпхъэхэм я уасэхэр зэпымыууэ дэуей-къеухыу йокIуэкI. ИкIи ахэр я нэхъыбэм зэлъытар политикэрщ. Ауэ къохъу дуней къэхъукъащIэхэри Iуэхум къыщыхэIэбэ.

Псалъэм и хьэтыркIэ, зы доллар баррелым и уасэр доллари 137-м нэсауэ щытащ 2008 гъэм и мэкъуауэгъуэм. Ар зи гугъу тщIы тIуми я Iэужьт: США-р 2003 гъэм Иракым зэрытеуамрэ «Катрина» жьапщэшхуэм 2005 гъэм Мексикэ псы дэжыпIэм щIыдагъэ къыщIэшыпIэ куэд зэрыщызэтрикъутамрэ. АрщхьэкIэ 1973 гъэм екIуэкIа хьэрып-израиль зауэм ипэкIэ зы щIыдагъэ баррелым щIатыр доллари 2-5 къудейт. А гъэсыныпхъэр абынэхърэ нэхъ пуд хъуауэ ящIэжыркъым.

Газым и уасэхэр зэлъытар политикэм и закъуэщ. Апхуэдэ гъэсыныпхъэ кубометр 1000-м 2022 гъэм гъатхэпэм и уасэр доллар мини 3,7-м щынэса щIыналъэхэр Европэм щыIащ. Ар къызыхэкIар езым къыхуэмыгъэза щхьэусыгъуэхэм къыхэкIыу Урысейм континентым хуаутIыпщ газым кIэригъэхун хуей зэрыхъуарщ. Евросоюзым и гугъащ адрей санкцэхэм къадэкIуэу апхуэдэ IэмалкIэ ди къэралым и экономикэр иригъэтIысэхыну. АрщхьэкIэ удыныр я щхьэм техуэжащ. Иджы зэгухьэныгъэм хэт езыхэр зэгурыIуэжыркъым: языныкъуэхэм къагурыIуащ Урысейм и гъэсыныпхъэ ямыIэу зэрымыпсэуфынур, адрейхэм зэкIэ лIыгъэм зрагъэхьу заIыгъщ.

Абы щыгъуэми, щIымахуэр къоблагъэ икIи ар ткIиину жаIэ. Ауэ щабэу къыщIэкIми, хьэкухэр ягъэплъын зэрыхуейр гурыIуэгъуэщ. Дэ и гугъу тщIыххэнкъым фабрикэхэмрэ заводхэмрэ газыншэу зэрымылэжьэфынум. Москва, къапщтэмэ, и политикэр псоми зэхащIыкIын хуэдэу къызэрыгуэкIщ: газу зыхуеинум хуэдиз ярищэнущ икIи ар КъухьэпIэм ирищIылIа санкцэхэм хигъэхьэххакъым. Уеблэмэ хьэзырщ «Ищхъэрэ унэтIыныгъэ-2» бжьамий щIэрыпсыр къызэIуихыну.

ЗэкIэ европей къэралхэм я унафэщIхэм езыхэм я цIыхухэр къыхураджэ щыгъын хуабэхэр, зрикъун пхъэрэ фIамыщIрэ зэрагъэпэщыну. Зыгуэрхэм щогугъ. АрщхьэкIэ уафэм ауэ сытми зыри къехуэхыркъым. Дыпэплъэнщ къэкIуэнум.

ЖытIэнщи, газри щIыдагъэри иджыпстуи лъапIэщ, къызэрех щымыIэу. Абы зэрыщыту уасэхэр къыщеIэт европей къэралхэм.