Мы махуэхэм Къэбэрдей-Балъкъэрым щы­хьэщIащ Урысей Федерацэм спортымкIэ щIыхь зиIэ и мастер, алыдж-урым бэнэкIэмкIэ тIэунейрэ олимп чемпион, щэнейрэ дуней псом щытекIуа, Европэм плIэнейрэ и чемпион Власов Роман. Абы лэжьыгъэ IуэхукIэ зэIущIэ дригъэкIуэкIащ ­КъБР-м и Iэтащхьэ КIуэкIуэ Казбек. Власовыр ди республикэм къэкIуащ 2016 гъэм екIуэкIа Олимп джэгухэм къыщыхэжаныкIа ди лъэпкъэгъу Джэду Iэниуар и гъусэу алыдж-урым, бэнэкIэ хуитхэмкIэ мастер-класс ягъэлъэ­гъуэну. ЗэIущIэм хэтащ КъБР-м спортымкIэ и министр Хьэсанэ Ислъам.

Зэпсэлъэныгъэхэм къыщаIэтащ спортым, къапщтэмэ, спорт бэнэкIэм зэрызегъэужьыныр: мыхьэнэш­хуэ зиIэщ бэнакIуэ щIэблэщIэ къыдэкIуэтейм гъэсэныгъэ хуэ­фэщэн бгъэдэлъхьэным, абыхэм лъагапIэ­щIэхэр къы­зэранэкIыным тегъэгушхуэ­ныр. Власовым къыхигъэщащ щIыналъэм бэнэкIэ лIэужьыгъуэхэм зегъэужьы­ным папщIэ Iэмал псори зэрыщыIэр. Iэзагъ лъагэ зыбгъэдэлъ тренерхэмрэ спортсмен лъэрызехьэхэмрэ - урысейпсо, дунейпсо утыкухэм щытекIуахэр - мащIэкъым.
Алыдж-урым бэнэкIэмрэ бэнэкIэ хуитымкIэ гуп зэпеуэ­хэм Къэбэрдей-Балъкъэрыр щыпашэхэм ящыщщ. «Адэ­кIи пытщэнущ спорт школ­хэм я тренерхэм я улахуэр хэгъэхъуэ­нымрэ спорт инфраструктурэр егъэфIэкIуэ­ным­рэ ехьэлIа лэжьыгъэхэм», - къыхигъэщащ КIуэкIуэ Казбек.
ЗэIущIэм щытепсэлъы­хьащ Кавказ-Ищхъэрэ фе­деральнэ щIыналъэм щыщ спорт­сменхэм зыгъэсэныгъэхэр щрагъэкIуэкIын, щIыналъэхэм я зэдай, урысейпсо зэхьэзэхуэхэр къыщызэрагъэпэщын алэрыбгъуи 6 - 8 зыщIэхуэн бэнэкIэ пэшы­шхуэр ухуэным. Власовым къыхилъхьащ илъэс къэс щIыкIэм тету урысейпсо чемпионат Къэбэрдей-Балъкъэ­рым щрагъэкIуэкIыну. Республикэм и Iэтащ­хьэм жэрдэмыр диIыгъащ, проектми елэ­жьы­ну траухуащ.
КIэухыу КIуэкIуэ Казбек Власов Роман тыгъэ хуищIащ Къэбэрдей-Балъкъэрыр илъэ­си 100 зэрырикъум и щIыхькIэ къыдагъэкIа медалыр. «Дызэдэлэжьэнщ икIи ди къару псори етхьэлIэнщ спорт бэнэкIэр Урысейми ди республикэми зыщиужьы­ным», - къыхигъэщащ республикэм и Iэтащхьэм.