Кёп болмай «Къоркъуусуз эм тынгылы  автомобиль жолла» миллет проектге кёре,  «Прохладный — Эльбрус» жолну  эки километр чакълы бири  болжалдан алгъа  жангыртылгъанды. Аны юсюнден бизге КъМР-ни Транспорт эмда жол мюлк министерствосундан билдиргендиле.

Автомобиль жолла бла байламлы информация арадан билдиргенлерича,  объектни ремонтуна 20 миллион сом къоратылгъанды. Ишлени кезиуюнде он жылны ичинде тийилмеген  Сога улу бла  Лесная орамлагъа да къаралгъанды.  Ала  сабий сад,  амбулатория  эм межгит орналгъан элге  магъаналыдыла. 

Подряд организацияны келечилери жолланы мурдорун игилендиргендиле, жауун суу барырча арыкъла, быргъыла тартхандыла  тротуарла, бордюрла, къоркъуусузлукъну жалчытырча буруула эм жангы белгиле да    салгъандыла.

Саулай алып айтханда, бюгюнлюкде  миллет проектге кёре 25 объектден 18-си хазыр болгъанды. Алай бла планда  белгиленнген 98 километрден 68 чакълысы  хазырды.