"Машук-2022" битеуроссей жаш тёлю форумда, тёреде болгъаныча, билим бериу эмда маданият жаны бла тюрлю-тюрлю майданла ишлейдиле. Быйыл ала 20-дан артыкъдыла: мастер-классладан башлап кюч салыуну излеген оюнлагъа дери.

Форумну ючюнчю кюнюнде Жаш тёлюню ишлери жаны бла федерал агентствону грант конкурсу бардырылгъанды. Ол башха жылладан эсе энчи эди – проектлени къоруулау сау сменнге созулмай, бир кюнню ичинде ётгенди. Ахча болушлукъ алыр ючюн эришиуге къуру Шимал-Кавказ федерал округдан угъай да, къыралны башха жерлеринден да аслам жаш адам къатышханды. 

Грант конкурсха биринчи сменде 120-дан  аслам заявка берилгенди. «Кёргюзтюлген проектлени асламысы миллет адет-тёрелеге, маданият байламлыкълагъа, патриот ниетде юйретиуге эмда чыгъа туруучу къаугъаланы сылтауларына жораланнгандыла. Алай башха темалагъа аталгъан ишле да кёп эдиле»,-дегенди федерал агентствону жаш тёлю проектлерини битеуроссей конкурсуну эксперти Юрий Купоросов.

Проектлерин энди къорууларыкъланы уа ол методика эсгертиулеге эс бурургъа, огъурлу ниетлени сакъларгъа, кючлерине базыныргъа, экспертле бла тюз да шуёхлары блача кенгеширге чакъыргъанды. «Биз проектлеригизге себеплик этилирин, ала жашауда бардырырларын кёлюбюз бла сюебиз»,- деп чертгенди ол.

Проектлени къоруулау ётгенден сора, грант конкурсну экспертлери форумчула бла ушакъла бардыргъандыла эмда жангылычларыны юслеринден айтхандыла, эсгертиуле этгендиле.

Ахча болушлукъ аллыкъ машукчуланы атлары форумну биринчи смени жабылгъан кюн белгили боллукъдула.

«Машук-2022» битеуроссей жаш тёлю форумгъа къатышханла айтхылы спортчула бла – боксчу, спортну халкъла аралы класслы устасы Сослан Асбаров, эркин тутушуудан дунияны чемпионатыны доммакъ майдалына тийишли болгъан, Токиода Олимпиада оюнлагъа къатышхан Мусукаланы  Исмайыл эмда эркин тутушуудан миллет командагъа кирген, Европаны чемпиону да болгъан Махмуд Магомедов бла - тюбешгендиле.