Бизни республиканы ичи бла баргъан «Кавказ» федерал жолну энтта да жыйырма километрден артыкъ кесеги тёрт ызлы бола турады. Специалистле шёндю Малка бла Куба элни арасында сегизкилометрлик участкада мадар эте турадыла эмда Аргудан элден башлап Шимал Осетияны чегине дери кесегинде къармашадыла. Объектлени экилеринде да 60 адам ишлейди. Алада хайырланыуда кереклисича бир техника барды, деп билдиргендиле жоллагъа къарагъан «Кавказ» управлениядан.

Ремонт этиле тургъан участкаланы экисинде да бир сутканы ичинде 35 минг автомашина ётеди. Ол жерле тёрт ызлы болсала, къоркъуусузлукъ игиленирикди, транспортну жюрюую да женгилирек боллукъду.

Башында сагъынылгъан сегизкилометрлик кесекде ишле быйыл жаз башында башланнгандыла. Шёндю анда жолну мурдорун кючлендириу эм кенгертиу бла кюреше турадыла. Жауун суула жыйылмазча тёрт эски быргъыны да жангыртырыкъдыла. Ишлени барын да келир жыл октябрьде бошаргъа умут этедиле.

Лескен районда объектни уа 2024 жылда берликдиле хайырланыугъа. Жолчула аны тёрт километр участкасында эски асфальтны къырып кетергендиле, ызы бла жанларына топуракъ тёгюп кенгертгендиле, юсюне уа геотекстиль жайгъандыла. Бир-бир жерлеринде асфальт салып да башлагъандыла. Ишни кезиуюнде 21 быргъы жангыртыллыкъды.

Машинала баргъан жолларындан бир жанына чыкъмазча аны ортасы бла буруула тартырыкъдыла. Дагъыда белгиле орнатырыкъдыла, асфальтда ызланы уа термопластикден жарашдырлыкъдыла. Кече жарыкъ болурча чыракъла, автобуслагъа павильонла, пешеходлагъа жолчукъла эмда энчи светофорла – ол бары да этилликди.

Управленияда айтханларыча, ахыр эки жылны ичинде бу трассаны 36-километрлик кесеги тёрт ызгъа дери кенгертилгенди.