Къабарты-Малкъарны Бизнес-инкубаторунда республиканы прокурору Николай Хабаров Нальчик шахар округну бизнесменлери бла тюбешгенди. Сёз анда тышында экономика болум тапсыз чекге жетген кезиуде предпринимательствогъа себеплик этиуню юсюнден баргъанды, деп билдиргендиле КъМР-ни прокуратурасыны пресс-службасындан.

Тюбешиуге жыйырмадан артыкъ инсан къатышханды. Ол санда регионда Предпринимательлени эркинликлерин къоруулау жаны бла уполномоченный Юрий Афасижев, УФНС-ни башчысы Аслан Губачиков, «Опора России» жамауат организацияны жер-жерли бёлюмюню башчысы Альберт Кильчуков, КъМР-ни Сатыу-алыу-промышленность палатасыны председателини орунбасары Мурат Гукетлов, министерстволаны башчылары эмда Нальчик шахар округну мэри Таймураз Ахохов да бар эдиле.

Ушакъны кезиуюнде бюджетге налогла эмда тёлеуле жыйыуну, предпринимательлени кредит ресурсла бла женгил жалчытыуну, аланы республиканы къырал власть органларына обращенияларын сюзюуню юсюнден сёлешгендиле. Дагъыда адамланы иш бла жалчытыу эмда налог режимле бла байламлы темала да кётюрюлгендиле. Жыйылгъанлагъа тийишли законланы юсюнден айтылгъанды, талай сорууланы юсю бла уа надзорлукъ жумушла тамамланнгандыла.