КъБР-м узыншагъэр хъумэнымкIэ и министр Къалэбатэ Рустам зригъэлъэгъуащ Дзэлыкъуэ район сымаджэщым и поликлиникэ къудамэм щекIуэкI зэгъэпэщыжыныгъэ лэжьыгъэхэр зды­нэсар. Ар ягъэзащIэ «КъБР-м узыншагъэр хъумэнымкIэ и IэнатIэм цIыхухэм япэ дэIэпыкъуныгъэхэр щыхуащIэ и IуэхущIапIэхэр къэгъэщIэрэщIэжын» щIыналъэ программэмкIэ.

Дзэлыкъуэ район сымаджэщым и дохутыр нэхъыщхьэм и къуэдзэ ЗекIуэрей Заринэ министрыр щигъэгъуэзащ мы зэманым къриубыдэу поликлиникэм и къатитIыр сыт лъэныкъуэкIи зыхуей зэры­хуагъэзам. IуэхущIапIэм и инженер коммуникацэхэр псори щIэкIэ яхъуэжащ, бжэ, щхьэгъубжэ блыпкъэхэр зэра­хъуэ­кIащ, пэш кIуэцIхэм щекIуэкIа лэжьыгъэхэр зэфIагъэкIащ. Иджыпсту ухуа­кIуэхэм зэгъэпэщыжыныгъэ Iуэхухэр къыщ­рахьэжьащ япэ къатым.

Къалэбатэ Рустам пщэрылъ ящищIащ цIыхухэм япэ медицинэ дэIэпыкъуныгъэр щыхуащIэ IуэхущIапIэхэм папщIэ къыхалъхьа иджырей мардэщIэхэр и лъаб­жьэу поликлиникэм и лэжьыгъэр ягъэпсыну, IэщIагъэлIхэр щылажьэ пэш­хэр тыншу къызэрыбгъуэтыну зэхэкIыпIэ картэхэр ягъэхьэзырыну, апхуэдэуи лиф­тыр зэрахъуэкIыну.

Министрымрэ абы и къуэдзэ Къармэ Маратрэ къапщытащ сымаджэхэм, къэ­рал Iуэхутхьэбзэхэм я порталхэр къагъэ­сэбэпу, дохутырым и деж зэрызебгъэтх Iэмалыр къызэрагъэсэбэпыр.

Поликлиникэм щрагъэкIуэкI зэгъэ­пэщыжыныгъэ лэжьыгъэхэр яухынущ мы илъэсым къриубыдэу.