Къэбэрдей-Балъкъэр Республикэм и Iэтащхьэ КIуэкIуэ Казбек къипщытащ щIыналъэр илъэси 100 щрикъум ирихьэлIэу Налшык щызэфIах лэжьыгъэхэр зэрекIуэкIыр. Ахэр псори зэфIэкIауэ щытын хуейщ фокIадэм и 10-м ипэ къихуэу. А махуэращ республикэм щекIуэкIыну гуфIэгъуэхэм я нэхъыщхьэхэр щыщыIэнур.
НаIуэ зэрыхъуамкIэ, лэжьыгъэхэр щызэфIэкIакIэщ жылагъуэ зыгъэпсэхупIэу блым. Ахэр хиубыдащ «Къалэ щIыпIэхэр зэпэщ щIын» федеральнэ проектым. Апхуэдэхэщ КъБКъУ-м къедза скверыр, Къуэныкъуейм и цIэр зезыхьэ уэрамым щыIэ «Курортный» хадэ цIыкIур. Гагарин Юрий и цIэр зезыхьэ скверым игъэдэхэнущ Налшык аэропортым къедза щIыпIэр. Ари мы махуэхэм зэпэщ ящI: автомобиль псынщIэхэм я гъэувыпIэхэр, рейсым пэплъэхэм зыщагъэпсэхуну щIыпIэхэр нэхъ тынш ящI. Ленинымрэ Тэрчокъуэмрэ я цIэхэр зезыхьэ уэрамхэм я зэхэкIыпIэм деж иIэ, КъБКъМУ-м къедза, Идарым и цIэр зезыхьэ уэрамымкIэ Мовсисян и цIэр зезыхьэ уэрамдыхьэм къыщыщIэдзауэ Тырныауз дэлъэдапIэм нэс къиубыду щыIэ, Мэлбахъуэмрэ Комаровымрэ я цIэхэр зезыхьэ уэрамхэм я зэхэкIыпIэм деж щаухуауэ щыта, «Нарт» хьэблэм щыIэ хадэ цIыкIухэри сыт и лъэныкъуэкIи хьэзыр хъуащи, махуэшхуэм зыхуащIу мэщIэращIэ.
А скверхэм щагъэтIыса удз гъагъэхэм псы теутхапIэхэри хуащIыжащ, архитектурэкIэ теплъэ дахэ яIэу. КъинэмыщIауэ, а хадэ цIыкIухэм яIэнущ спорт, сабий джэгупIэ утыку зэмылIэужьыгъуэхэр, адэ-анэхэмрэ цIыкIухэмрэ я зыгъэпсэхупIэхэр, уэршэрыпIэхэр, лъэс лъагъуэхэр.
Мы зэманым лэжьыгъэшхуэхэр щокIуэкI КъБР-р илъэси 100 зэрырикъум и щIыхькIэ скверым. Ар щаухуэ Сабийхэмрэ щIалэгъуалэмрэ я творчествэмкIэ республикэ уардэунэмрэ Абхъазым и цIэр зезыхьэ утыкушхуэмрэ я зэхуэку дэлъ щIыпIэм. УхуакIуэхэм яубзыхуакIэщ скверым и планыр, щIытIхэри зэфIэкIащ. Иджыпсту зэфIагъэувэ абджыпсым къыхэщIыкIа гъэлъэгъуапIэ унэшхуэр. Абдеж къыщызэрагъэпэщынущ махуэшхуэ выставкэ зэмылIэужьыгъуэхэр, литературэ пшыхьхэр, лекцэхэр, кинохэр щагъэлъэгъуэнущ, зэIущIэхэр, зэхуэзэ хьэлэмэтхэр щрагъэкIуэкIынущ. Апхуэдэу гъуэгу нашэкъашэхэр зыхэт, хъыринэхэр, къежэхыпIэхэр зиIэ сабий джэгупIэхэри щыIэнущ, творческэ мастерской зэмылIэужьыгъуэхэр, сабиймрэ анэмрэ я пэшхэри къыщызэрагъэпэщынущ а щIыпIэм. А хадэ цIыкIур хъунущ къалэдэсхэри абы и хьэщIэхэри малъхъэдисым хуэдэу зыщIэзышэ зыгъэпсэхупIэщIэ.
Республикэм и Iэтащхьэм къигъэнэIуа къалэнхэм япкъ иткIэ, зэгъэпэщыжыныгъэ лэжьыгъэхэр щокIуэкI къалащхьэм Псыхуабэ, Владикавказ лъэныкъуэхэмкIэ къикIыу уакъыхуэзышэ дэлъэдапIэхэм деж. А щIыпIэхэм щыIэ архитектурэ-декорацэ ухуэныгъэхэр зыхуей хуагъэзэж, уэздыгъэхэр гъуэгухэм фIадзэж, удз гъагъэхэмрэ жыг щхъуантIэхэмрэ щагъэтIыс, къедза Iэшэлъашэр ягъэкъабзэ, ягъэдахэ. «ИгъащIэкIи Урысейм дригъусэу» щIэжыпIэшхуэр зыхуей хуагъэзэжакIэщ.
Зи гугъу тщIы IуэхущIапIэ, IэнатIэ псоми щекIуэкI ухуэныгъэ-зэгъэпэщыжыныгъэ лэжьыгъэхэм я тегъэщIапIэщ лъэпкъ проектхэр, федеральнэ, щIыналъэ, щIыпIэ къэрал программэхэр. Лэжьыгъэхэр псори зэфIах яубзыхуа планым тету, къыкIэрыху щымыIэу. УхуакIуэхэр къызэгъэпэщащ зыхуеину техникэкIи Iуэхум ирахьэлIэ пкъыгъуэхэмкIи.
- Мы лъэхъэнэм зэфIэдгъэкI лэжьыгъэхэр зэпхар ди республикэр илъэси 100 зэрырикъум и закъуэкъым. Къэбэрдей-Балъкъэрым и цIыхухэм я гъащIэр егъэфIэкIуэным хуэщIа а Iуэхугъуэхэм пытщэнущ, ахэр къыщыгъэлъэгъуа проектхэр гъэзэщIэным адэкIи делIэлIэнущ, - къыхигъэщащ КIуэкIуэ Казбек.
Журналистхэм щепсалъэм щIыналъэм и унафэщIым къыхигъэбелджылыкIа Iуэхугъуэхэм ящыщщ Налшык щаухуа гъуэгущIэхэр къэзыгъэнэхуну уэздыгъэхэр электрокъару нэхъ мащIэ зыхьхэм зэращыщынур. АбыкIэ къыдагъэхуэнущ къалэ щIыпIэм къыщагъэсэбэп энергием. КъинэмыщIауэ, къыхигъэщащ ЩоджэнцIыкIум и цIэр зезыхьэ уэрамым псы хуабэ зэрырикIуэ бжьамийхэм зэрыщелэжьыр, Къэбэрдей уэрамым и автомобиль гъуэгуми зэхъуэкIыныгъэ зэригъуэтынур. Уэрамым и Iыхьэу федеральнэ гъуэгум ухуэзышэр нэхъ бгъуэ ящIынущ, машиниплI щызэблэкIыфын хуэдэу. Ар хъунущ уэздыгъэ нуркIэ гъэнэхуа гъуэгу тынш икIи бгъуэ.
КъБР-м и Iэтащхьэр апхуэдэу къытеувыIащ автобус къэувыIэпIэхэм деж щыIэ сату IуэхущIапIэ цIыкIухэр нэгъуэщI щIыпIэхэм зэрахьынуми. Абы зэрыжиIамкIэ, а IуэхумкIэ хьэрычэтыщIэхэм ягуроIуэри, нэхъыфI зэрыхъунум хуэдэу ящI. Кулиевым и цIэр зезыхьэ уэрамым щызэфIэкIащ апхуэдэ сату щIыпIэхэр Iухыныр. КъэувыIэпIэхэм деж щагъэув иджырей мардэхэм къезэгъ ухуэныгъэ екIухэр. Апхуэдэ лэжьыгъэхэр щекIуэкIынущ Головком и цIэр зезыхьэ уэрамми.
- Ухуэныгъэм и хабзэ гуэрми темыщIыхьауэ къызэрагъэпэща а IуэхущIапIэ цIыкIухэм къалэм и теплъэр ягъэдахэу пхужыIэнукъыми, а Iуэхур тэрэз щIынми яужь дитщ, - жиIащ КIуэкIуэ Казбек.