«Жемчужина Кавказа» круиз поезд Нальчикни вокзалына онунчу кере келеди. Бу жол туристле бла бирге бизде къонакъда Россейли темир жолланы (РЖД) пассажир поездле жаны бла департаментини башчысыны биринчи орунбасары Елена Ракова да болгъанды, деп билдиреди республиканы Курортла эм туризм министерствосуну жамауат эм асламлы информация органла бла байламлыкъла жюрютюу жаны бла бёлюмюню таматасы Ольга Погребняк.
- Темир жол туризмни айнытыу бла РЖД эки жылны кюрешеди, быйыл бизни пакетибизде отуз продукт барды, аланы арасында «Жемчужина Кавказа» майны аллындан башлап сентябрьни ахырына дери хар ыйыкъдан жюрюген жангыз круиз турду. Андан сора да, «чархлада къонакъ юй» форматны айнытабыз, муратыбыз къыралны хар регионун кёргюзтюргеди, артда инсан алагъа юйюрю неда шуёхлары бла бир ненча кюннге солургъа къайтырча. Бир ыйыкъны ичинде Кавказны субъектлерини кёбюсюн кёрген ол, керти да, зауукълуду, - дегенди Елена Ракова.
Проект дайым жангыртылгъанлай, игилендирилгенлей турады. Хар жолоучулукъдан сора жумушланы качестволарына багъа бичиледи, адамла болгъан жерлеринде нени жаратханларына, аланы сезимлерине къаралады.
КъМР-ни Курортла эм туризм министерствосу РЖД-ны келечилерине республика бла шагъырейлениу тур къурагъанды, къонакъланы биргелерине ведомствону башчысы Мурат Шогенцуков да баргъанды. Ишчи жолоучулукъну кезиуюнде ала байламлыкъла жюрютюрге, болгъан маршрутха «Шато-Эркен» къаланы, «Асыл-Суу» чабакъ мюлкню, «Гедуко» дарман сууланы къошаргъа келишгендиле.
Елена Ракова белгилегенича, туристлени сайлауларына кёре Шимал Кавказны регионларыны араларында эм бийик рейтинг Къабарты-Малкъардады. Экскурсия программасына, транспорт жумушла бла жалчытыугъа да эм бийик беш балл жангыз анга салыннганды. Уллу ыразылыкъларын ала гидле Дарья Фроловагъа, Виолетта Тихоновагъа бла Максим Пушкаревгъа билдиргендиле.
Круиз поездлени кюнлери энчи халда тохташдырыладыла, хар шахарда ала 5-9 сагъат турадыла. Вагонла 70 процентге толадыла, адамла аланы эм ырахатларын сайлайдыла. «Жемчужина Кавказа» барысындан да узун эм хар заманда да къуралыучу турду. Келир жыл анга башха республиканы къошар мурат барды. Бизге ол Майкопдан быйыл 22 рейс этерикди. Регионубузгъа аны бла 5 мингнге жууукъ турист келлиги сакъланады.
Кульчаланы Зульфия.
