Налшык къалэ и курорт щIыпIэм щыIэщ сабий санаторэ, турист базэ куэд. Абыхэм илъэс къэс къокIуэ Урысейм и щIыналъэ псоми къикI сабий минхэр. ЦIыкIухэм шынагъуэншэу загъэпсэхуныр къызэгъэпэщыныр абы ехьэлIа министерствэхэмрэ ведомствэхэмрэ я къалэн нэхъыщхьэхэм язщ.
«Кавказ» сабий санаторэм щрагъэкIуэкIащ «Зыгъэпсэхугъуэ зэманыр шынагъуэншэу» акцэ. Iуэхур къызэрагъэпэщащ щIыналъэ МЧС-м и лэжьакIуэхэм, Къэрал автоинспекцэм и лIыкIуэхэмрэ республикэм и мафIэсгъэункIыфI-къегъэлакIуэ IэнатIэмрэ я лэжьакIуэхэмрэ.
ЗыгъэпсэхупIэм иубыд и щIыпIэр зыщагъасэ утыкуитхуу ягуэшат. Япэм деж къызэрымыкIуэ щытыкIэхэмкIэ ведомствэм и лэжьакIуэхэр сабийхэм епсэлъылIащ узыншэу псэуным, щIыуэпсым шынагъуэншэу зыщагъэпсэхуным ехьэлIа хабзэхэм теухуауэ. Апхуэдэуи ныбжьыщIэхэм жраIащ мафIэсыр къэзышэ щхьэусыгъуэхэр, мафIэм уриджэгуныр зэрышынагъуэр, гузэвэгъуэ къэхъуамэ МЧС-р телефонкIэ къызэреджапхъэр. Сабийхэм ягу къагъэкIыжащ къызэрымыкIуэ щытыкIэ къэхъумэ япэу ящIэн хуейр, щагъэгъуэзащ мафIэр зэрагъэункIыфI Iэмэпсымэхэмрэ ахэр къызэрагъэсэбэп щIыкIэхэмрэ.
ЕтIуанэ утыкум псыхэм цIыхухэм я шынагъуэншагъэр къыщызэгъэпэщынымкIэ къудамэм и инспекторхэр щытепсэлъы- хьащ зыщагъэпскIкIэ зытетыпхъэ хабзэхэм икIи буклетхэр хуагуэшащ.
Къэрал автоинспекцэм и лэжьакIуэхэм сабийхэм гурагъэIуащ гъуэгу, светофор дамыгъэхэм я мыхьэнэр, ягу къагъэкIыжащ автомашинэ щызежэ гъуэгум лъэсу, лъакъуэрыгъажэм утесу, рулым удэсу зэрыщызекIуапхъэ мардэхэр, гулъытэншэу къагъэнакъым транспортым и кIуэцIым зэрызыщыIыгъыпхъэри. Псалъэмакъым пащэу ирагъэлъэгъуащ ДПС автомашинэр. Сабийхэм абы и Iэмэпсымэхэм щыгъуазэ защIащ, макъыр ину зыгъэIур къагъэсэбэпри, зызыгъэпсэхухэр къыхураджащ хабзэм тетыну, гъуэгум щысакъыну.
ЕплIанэ утыкум щызэхуэса сабийхэм жраIащ фэбжь зыгъуэтам япэу етыпхъэ дэIэпыкъуныгъэр. Фэбжьхэр зыхуэдэнкIэ хъунум, лей зытехьам зэреплъыпхъэм щыгъуазэ ящIащ. Тренажерым щагъэлъэгъуащ гумрэ тхьэмбылымрэ реанимацэ зэрыщIыпхъэр, лъыр къызэрыгъэувыIэн хуейр, къупщхьэ къутам шинэ телъхьэнымрэ нэгъуэщI Iуэхугъуэхэу цIыхур къегъэлынымкIэ Iэмалхэмрэ.
Хабзэ зэрыхъуауэ, псори нэхъ дэзыхьэхащ мафIэс-къегъэлакIуэ техникэр щагъэлъагъуэ утыкур. МафIэс-къегъэлакIуэ часть №1-м и унафэщI Ширин Станислав сабийхэр щыгъуазэ ищIащ автомобилым и тактико-техникэ щытыкIэм, тепсэлъыхьащ зэфIагъэкI Iуэхухэм. Сабийхэм яфIэгъэщIэгъуэну зэпаплъыхьащ техникэр. абыхэм упщIэхэр я куэдт икIи дэтхэнэми хуэфащэ жэуап яIэрыхьащ. Апхуэдэуи ныбжьыщIэ цIыкIухэм Iэмал иратащ мафIэсгъэункIыфIхэм я фащэр зрагъэпщэну, абыхэм я автомашинэм и рулым дэтIысхьэну, уеблэмэ къэхъуа хуэдэ мафIэсыр ягъэункIыфIыну.
Сабийхэм дэрэжэгъуэшхуэ ягъуэтащ, нэхъыщхьэращи, щхьэпэ хъун куэдым щыгъуазэ ящIащ.
УЭРДОКЪУЭ Женя.