Бу кюнледе «Эльбрус» курортда тау лыжаладан «Элбрусну саугъалары» деген битеуроссей эришиуле бардырылгъандыла. Анда хорлагъанланы саугъалаугъа «Кавказ. РФ» акционер обществону директору Хасан Тимижев, аны орунбасары Беккаланы Хыйса, КъМР-ни спорт министри Хасанланы Ислам, Россейни Тау-лыжа спортдан федерациясыны президенти Леонид Мельников, Россейни Фристайлдан федерациясыны президенти Алексей Курашов къатышхандыла.

Эришиуле 25-28 июньда «Гара-Баши – «Мир» трассалада ётгендиле. Башланнган а 3 847 метр бийикликде этгендиле. Ары 12-15-жыллыкъ жашла бла къызла «слалом-гигант» бла «слалом» дисциплиналада кеслерин сынагъандыла.

12-13 жыл толгъан жашланы ичинде «слаломда» алчыланы санында Иркутск областьдан Никита Дудков, «слалом-гигантда» уа Москва областьдан Александр Коробов болгъандыла. Къызланы араларында Красноярск крайдан Софья Решетник эки тюрлюсюнде да «алтынны» алгъанды.

Таматаладан а «слалом-гигантда» Иркутск областьдан Михаил Новосельцев хорлагъанды. Ленинград областьдан келген Валерий Шибеко «слаломда» кесин кёргюзтгенди.  Башкъортостан республикадан Танзила Исраилова а эки тюрлюсюнде да хорлагъанды.

Эришиулени эм иги командасына Мурманск областьны къаууму саналгъанды. Алагъа Къабарты-Малкъар Республиканы Башчысыны Кубогу бла ахча берилгенди. «Хорламгъа итиниулюгю ючюн» деген Кубок бла ахча саугъаны КъМР-ни тау-лыжа эм альпинизм спорт школуну къаууму алгъандыла.

- Бюгюн эм кючлюлени саугъалагъанбыз, алай къалгъанла да юйге къуру къол бла къайтырыкъ тюйюлдюле. Минги тауда жайда да къарны эримей тургъаны да саугъады. Алай учаргъа сюйгенлеге ючюнчю июльгъа дери жарарыкъды. Профессионал спорчуланы уа бизде фристайлден, тау-лыжала бла сноуборддан жыйымдыкъ эм регион къауумланы жараулары майдан июльгъа дери бардырылыучудула. Аланы жыл сайын къураргъа умут этебиз. Бизни ишибизни баш магъанасы – инфраструктураны айнытыу бла тау-лыжа курортлада спорт базаланы къурауду. Ол жумушха биз Экономика айнытыу министерство бла эм РФ-ни Спорт министерствосу бла бирге къарайбыз, - деп, чертгенди Хасан Тимижев.

Саугъалау бошалгъандан сора Хасан Тимижев ишчи кенгеш ётдюргенди. Анда Азау таланы тапландырыуну юсюнден, дагъыда Элбрусну тийресинде ишлене тургъан жангы трассаланы бла канат жолланы юслеринден да сёлешиннгенди.

Додуланы Мадина.