Кёп болмай РФ-ни экономиканы айнытыу эм табийгъат байлыкъла эмда экология министрлерини орунбасарлары Сергей Назаров бла Сергей Ястребов, «Кавказ.РФ» компанияны таматасы Хасан Тимижев эм «Эльбрус» миллет паркны директоруну къуллугъун толтургъан Чочайланы Малик «Эльбрус» энчи экономика зонаны (ОЭЗ) миллет паркга заран жетдирмей айнытыуну юсюнден келишимге къол салгъандыла.
Келишимни магъанасы – бирге къыйматлы амалла излергеди, ол санда энчи экономика зонада ишлени байламлыкъда бардырыргъады. Андан сора да, бир бирге билдириуле, эсгертиуле этилликдиле эм чыкъгъан проблемаланы тамамларча ишчи къауумла къураллыкъдыла, дегендиле «Кавказ.РФ» биригиуню пресс-службасындан.
Серегей Назаров айтханнга кёре, «Эльбрус» тау-лыжа курортха энчи экономика зона даража берилгени саулай республиканы айнытыугъа да хайырлыды. Ол регионну социал-экономика жаны бла магъаналы бёлюмлеринден бирине эрттеден бери саналып келеди, къыйматлы болгъанлай да къалады. Болсада Элбрус тамаша табийгъаты бла да белгилиди. Ол себепден специалистле бла кенгешмей мында бир тюрлю иш бардырыргъа жарарыкъ тюйюйлдю.
«Эльбрус» энчи сакъланнган зона 2011 жылда къуралгъанды. Анга турист-рекреация комплекс киреди. Курортда къыралда эм бийикде орналгъан юч гондол канатка ишлейди. Тау лыжалада уа ноябрьни ахырындан башлап июнь айгъа дери учаргъа онг барды. Келир заманны юсюнден айтханда, 2030 жылгъа дери 47 километрге тау-лыжа трасса эм 14 канат жол ишленирикдиле. Алай бла туристлени санын 1,12 миллионнга жетдириге онг табыллыкъды.
Бизни корр.
