Къабарты-Малкъарны келечилери Къыргъызстанны ара шахары Бишкекде «АЮ ГРАНД» комплексде «Expo-Russia Kyrgyzstan 2022» биринчи халкъла аралы кёрмючге къатышхандыла. Анга Россейден, Къыргъызстандан, Ирандан эм Орта Азияны къыралларындан эки жюзден аслам компания къатышханды. Ол очно эм тюзюнлей бардырылгъанды.
Къабарты-Малкъарны компаниялары Къыргъызстанны бла Орта Азияны рынокларына чыгъарча иги кесек келишим этерге онг тапхандыла. Аны бла бирге бирси жерледен коллегаларын республиканы сатыу-алыу- экономика онглары бла да шагъырей этгендиле. Бизни республикадан баргъан делегациягъа КъМР-ни Экономиканы айнытыу министерствосуну электрон жумушланы тамамлау эм оноу этиу системала жаны бла департаментни таматасы Жеттеланы Марина башчылыкъ этгенди.
Кёрмюч бла бирге форум да бардырылгъанды. Ол ачылырны аллында, Россейни тыш къыралланы ишлери жаны бла министри Сергей Лавровну алгъышлау письмосу окъулгъанды. Ол анда кёрмюч бла форум власть органланы, бизнесни эм экспертлени араларында байламлыкъны кючлерге эм айнытырча себеплик этериклерине ышаннганын билдиргенди.
Марина Ханбиевна айтханнга кёре, Къабарты-Малкъарны предприятияларыны продукцияларына эс бургъанла кёп болгъандыла. Аны хайырындан агропромышленный комплекс, медицина технологияла, илму, билим бериу жаны бла да къыйматлы келишимле этилгендиле. Бизнес - бизнес ючюн (В2В) форматда баргъан тюбешиуледе «Отбор», «Терекалмаз», «Базис», «Нэжан» эм башха биригиуле жангы рыноклагъа чыгъарча онгла ачылгъандыла.
Эсге сала айтсакъ, былтыр Къабарты-Малкъар бла Къыргъызстан 2183,38 минг доллар багъасына сатыу-алыу бардыргъандыла. Ол буруннгу жылдан эсе 1,3 кереге кёпдю. Аны бла бирге экспорт операцияны ёлчеми 2122,21 минг долларгъа жетгенди. Мында да 97 процент ёсюм эсленеди. Къабарты-Малкъардан Къыргъызтаннга кёбюсюнде какао эм андан продуктла, бал туз, татлы ашарыкъла, ундан, крахмалдан, сютден этилген абериле эм крупала жибериледиле.
Кёрмючню ишчи программасына кёре бизнес-форум, «тёгерек столла», пленар кенгешле да ётгендиле. Алада Россейни бла Къыргъзстанны арасында, ол санда ЕАЭС-ну чеклеринде байламлыкъны айнытыу онгла сюзюлгендиле.
Магометланы
Сулейман.