«Рахлин Анатолий и кубок» зыфIаща дзюдомкIэ ныбжьыщIэ зэхьэзэхуэ мы махуэхэм Санкт-Петербург щекIуэкIащ. Ар къызэрагъэпэщащ «ищхъэрэ къалащхьэм» щекIуэкIа 25-нэ Дунейпсо экономикэ форумым и дэIэпыкъуныгъэкIэ. 

Зэпеуэхэм хэтащ Сербием, Белоруссием, Монголием, Узбекистаным, Донецк ЦIыхубэ Республикэм, Къэзэхъстаным, Къыргъызым, Урысей Федерацэм и щIыналъэ 37-м къикIа дзюдоист 500-м щIигъу. 
Къэбэрдей-Балъкъэрым щыщ Жэмыхъуэ Марат спортсмен 70-м щIигъу зыхэта килограмм 73-м нэблагъэ зи хьэлъагъхэм я гупым щригъэкIуэкIа бэнэныгъэ гуащIэм домбеякъ медалыр щызыIэригъэхьащ. 
Рахлин Анатолий Урысейм щIыхь зиIэ и тренерщ, физическэ щэнхабзэм щIыхь зиIэ и лэжьакIуэщ. И тренер лэжьыгъэ лъэхъэнэм къриубыдэу абы дзюдомкIэ спортым и мастери I00-м щIигъу игъэхьэзыращ, Президент Путин Владимир и япэ тренеру щытащ ар. Щэнейрэ Европэм и чемпионатым щытекIуа Совет Союзым и цIыхубз командэ къыхэхар игъасэу лэжьащ. 
 

Къэхъун Бэч.