Ташлы-Таланы школунда къуралгъан лагерьде солугъан сабийлеге къонакъгъа полициячыла баргъандыла. Жолда жюрюуню къоркъуусузлугъуну эмда акъылбалыкъ болмагъанланы ишлери  жаны бла инспекторла   суратланы конкурсун да къурагъандыла.

Право низамны сакълаучула жашлагъа бла къызлагъа жолда къоркъуусузлукъну жорукъларын эсгертгендиле. Сёз белгилени  магъаналарыны, жолну тийресинде кесинги къалай жюрютюрге кереклисини юслеринден да баргъанды. Аякъ машинада жюрюрге сюйгенлеге уа инспекторла  орамдан ётген кезиуде жаяу болургъа кереклисин энтта бир кере ангылатхандыла.

 Инспекторла кече адам билинмегенин, аны хатасындан ачыргъа боллугъун да айтхандыла. Аны себепли  светоотражательлени жюрютюрге керекди. Полициячыла сабийлеге аланы юлешип, аякъ машиналарына бла самокатлагъа салыргъа болушхандыла.

 Ахырында суратланы конкурсу къуралгъанды. Къауумлагъа юлешинип, сабийле жол белгилени, светофорланы ишлегендиле, аланы магъаналарын ангылатхандыла, къоркъуусузлукъну жорукъларын къалай билгенлерин кёргюзтгендиле.

Тикаланы Фатима хазырлагъанды.