«Мен - Россейни инсаныма» патриот акцияны чеклеринде Нальчикни администрациясында 14 жыллары толгъан жаш адамлагъа РФ-ни инсаныны паспорту берилгенди. Бу къууанчлы тюбешиуге шахарны школларыны билим алыуда, жамауат жашауда, спортда жетишимле болдургъан  16 окъуучусу чакъырылгъандыла. Аны юсюнден бизге Россейни МВД-сыны Нальчикде управлениясыны пресс-службасындан билдиргендиле.

Жыйылыугъа Нальчикни администрациясыны башчысыны кенгешчиси   Сосланбек Бетрозов, КъМР-де МВД-ны Миграцияны соруулары жаны бла управлениясыны бёлюмюню таматасы   полицияны подполковниги  Ислам Заракушев да къатышхандыла. Тюбешиу Россейни эм Къабарты-Малкъарны гимнлерин согъуудан башланнганды.

Таматала Россейни инсаныны  паспортун быллай къууанчлы халда алгъанлары жаш адамланы эслеринде кёп жыллагъа къаллыгъын тежегендиле. Бу атны бийик даражада жюрютюрге, жууаплы болургъа чакъыргъандыла.    «Паспорт сизге жашауну кенг  жолларын ачады. Инсанлыкъ борчларыгъызны бет жарыкълы толтуругъуз, иги окъугъуз, жетишимли болугъуз»,-дегенди Ислам Заракушев.

Паспортларын алгъандан сора жаш адамла Россейге кертиликни антын келтиргендиле. Ала Конституцияны толтурургъа, Ата журтубузгъа кертичи болургъа, халкъланы тарыхын, культурасын, адетлерин сакъларгъа сёз бергендиле.

Тикаланы Фатима хазырлагъанды.