Санкт-Петербург живописымкIэ, скульптурэмрэ архитектурэмкIэ Репиным и цIэр зезыхьэ и Академием щагъэлъэгъуащ.ХудожествэхэмкIэ Урысей Академием хэт, Санкт-Петербург щыпсэу икIи щылажьэ СэвкIуий Хьэмид «Маккавейские войны» зыфIища и лэжьыгъэхэр.
Гъуазджэм и лIэужьыгъуэхэу графикэм, живописым, скульптурэм ехъулIэныгъэфIхэр щызиIэ ди лъэпкъэгъу сурэтыщIым и лэжьыгъэхэр ягу дыхьэнтэкъэ ар зылъэгъуахэм?! Выставкэм хагъэхьа и графикэ лэжьыгъэхэр сурэтыщIым игъэхьэзыращ «Вита Нова» тхылъ тедзапIэм къыщыдэкIа «Священные тексты» тхылъым папщIэ.
- СэвкIуий Хьэмид и Iэдакъэ къыщIэкIахэм къызэрымыкIуэ лэжьыгъэ яхэплъагъуэркъым. Зи хъэтI зиIэж художникым и сурэт псори зыгуэркIэ зэрызэщхьым гу лъыботэ, абыхэм ящIэлъ гупсысэм апхуэдизкIэ узыщIешэри, ахэр зэгъунэгъу ещIри, уи нэр здытеплъызэм зы сурэтым хуэдэу зэпыбогъэувэ, - жеIэ ХудожествэхэмкIэ Урысей Академием и академик, УФ-м гъуазджэхэмкIэ щIыхь зиIэ и лэжьакIуэ Михайловский Семён. – Хьэмид и лэжьыгъэхэр зытриухуар зэрыцIыкIурэ къэзыухъуреихь, фIыуэ зыщыгъуазэ Iуэхухэрщ, и лъэпкъым и тхыдэрщ.
СэвкIуий Владимир и къуэ Хьэмид Къэбэрдей-Балъкъэрым иIэпхъукIыу Къэзахъстаным и Джамбул къалэм щыпсэуа адыгэ унагъуэм I964 гъэм къыщалъхуащ. 1979 гъэм ар Налшык къэIэпхъуэжащ. СурэтыщI цIэрыIуэ Сындыку Анатолэ и лъэщапIэм щIэх-щIэхыурэ зэрыкIуам и фIыгъэщ Хьэмид а IэщIагъэм зэрыдихьэхар. ЯпэщIыкIэ ар щеджащ Ставрополь пединститутым и художественно-графикэ факультетым, иужькIэ живописымкIэ, скульптурэмрэ архитектурэмкIэ Репиным и цIэр зэрихьэу Санкт-Петербург дэт институтым монументальнэ живописымкIэ и къудамэм.
Хьэмид и IэдакъэщIэкIыу ди щIыналъэм щыIэм я гугъу пщIымэ, I997 гъэм Къэбэрдей-Балъкъэрым и Парламентымрэ Правительствэмрэ я унэхэм папщIэ игъэхьэзыращ «Иван Грозный принимает кабардинскую делегацию», «Выход пахарей» лэжьыгъэхэр.
2000 гъэм и лэжьыгъэхэр щагъэлъэгъуащ Барселонэ (Испание), 2002-2006 гъэхэм (живопись, графикэ, пхъэм къыхэщIыкIа скульптурэхэр) - Голландием (Амстердам, Гауда), 2004 гъэм Москва и сурэтыщIхэм я Унэм, «Белая река» зыфIаща и гъэлъэгъуэныгъэр Санкт-Петербург и СурэтыщIхэм я зэгухьэныгъэм хэтхэм я гъэлъэгъуапIэ пэшышхуэм щекIуэкIащ. Апхуэдэу СэвкIуийм живописымкIэ и выставкэхэр 2005 гъэм Самарэ, «Эпоха бронзы» зыфIищар а гъэ дыдэм Санкт-Петербург, къыкIэлъыкIуэхэр УФ-м и Къэрал Думэм и музейм, Санкт-Петербург ХудожествэхэмкIэ и академием, «Собирающие камни» зыфIищар 2006 гъэм Санкт-Петербург и СурэтыщIхэм я зэгухьэныгъэм щекIуэкIащ. Ар хэтащ Урысейм и сурэтыщIхэм я гъэлъэгъуэныгъэу Китайм къыщызэрагъэпэщам, урыс щэнхабзэм теухуауэ Голландием щекIуэкIа фестивалым.
СэвкIуий Хьэмид и Iэдакъэ къыщIэкIащ Къэбэрдей-Балъкъэрым и япэ Президент КIуэкIуэ Валерий и скульптурэр. Ар Къэбэрдей-Балъкъэр къэрал аграрнэ университетым и пщIантIэм 2007 гъэм щагъэуващ.
Урысейм и СурэтыщIхэм я зэгухьэныгъэм I996 гъэм СэвкIуийр хагъэхьащ. А гъэ дыдэм ХудожествэхэмкIэ урысей академием и ЩIыхь тхылъыр къыхуагъэфэщащ. 2007 гъэм къыфIащащ ХудожествэхэмкIэ урысей академием и член-корреспондент цIэр. Мы щIыхьыцIэхэм дэщIыбгъун иджыри куэду щыIэщ, нэхъыщхьэращи, ди хэкуэгъум и лэжьыгъэхэм щIэупщIэшхуэ щаIэщ ди къэралми хамэ щIыпIэхэми.
СэвкIуий Хьэмид и лэжьыгъэ телъыджэхэр щахъумэ къэралым и музейхэм, Урысейм, Китайм, Испанием, Голландием, Германием, нэгъуэщI щIыналъэхэм щыпсэууэ абы и Iэдакъэ къыщIэкIахэм дихьэххэм я уней гъэтIылъыгъэхэм хэлъщ. 2000 гъэм щыщIэдзауэ Хьэмид Санкт-Петербург ХудожествэхэмкIэ и академием живописымкIэ и факультетым сурэт щIынымкIэ и къудамэм щрегъаджэ. Зи хэкуэгъухэр зыщызымыгъэгъупщэ сурэтыщIым и лэжьыгъэхэр нэхъыбэу зытеухуар и лъэпкъым и тхыдэрщ, и къекIуэкIыкIарщ, и щIыналъэм и щIыуэпс къулейрщ, нобэрей гъащIэм и лъапIэныгъэхэрщ. Хьэмид и лэжьыгъэхэм гупсысэ куурэ купщIэ инрэ ящIэлъщ. СурэтыщIыр щIэх-щIэхыурэ Налшык къокIуэж икIи и гуапэу хэтщ ди щIыпIэм щекIуэкI щэнхабзэ, гъуазджэ зэхыхьэхэм, гъэлъэгъуэныгъэхэм. СэвкIуийм и IэщIагъэм, и зэфIэкIым и лъэпкъэгъухэр дрогушхуэ, ди щхьэр лъагэу дегъэлъэгъуж.
ТЕКIУЖЬ Заретэ.
