Бу кюнледе Къабарты-Малкъар Республиканы Жамауат палатасыны Советини жыйылыуунда сёз кёп сабийли юйюрлеге къыралны жанындан болушлукъ этиуню юсюнден баргъанды. Анга республиканы урунуу эм социал къоруулау министри Асанланы Алим, Россейни Пенсия фондуну регион бёлюмюню таматасыны орунбасары Зарема Дикинова къатышхандыла.
Жыйылыу башланырны аллында Жамауат палатыны председатели Хазратали Бердов РФ-ни Президентини Указына кёре кёп сабийли юйюрлеге болушлукъ тапдырыр ишлеге праволу база жарашдырылгъаныны юсюнден эсгертгенди. Тёреде болгъаныча кёп сабийли, къолайсыз, толу болмагъан эм сакъатла ёсдюрген юйюрлеге, ёксюзлеге болушлукъгъа субботникле эм республикалы жыйылыула къураладыла, аланы баш мураты жангы окъуу жылны аллында школчулары болгъан къолайсыз юйюрлеге бюджетден тышында тутхучлулукъ этиудю, деп къошханды.
Жамауат палатыны председателини орунбасары Людмила Федченко тийишли регион эм федерал законланы эсге салгъанды. Ма алагъа кёре къыралыбыз сабийли юйюрлеге тутхучлулукъ этиуню тюрлю-тюрлю амалларын хайырланнганын чертгенди.
– КъМР-ни Башчысы Казбек Коков кёп болмай КъМР-ни Парламентинде сёлеше, республиканы халкъны саны ёсгенин белгилеп айтханды. Анга шагъатха быллай шартла да келтиргенди: он жыл мындан алгъа республикадан кетгенлени саны 5 548 адамгъа жетгенди, 2017 жылда – 2 397 адамгъа, 2021 жылда уа адамларыбызны санына къошулгъанды – 250-ге. Ол шарт барыбызны да къууандырады, къыралны жанындан этилген болушлукъ хайыр келтиргенин кёргюзтеди, – дегенди Людмила Михайловна.
Асанланы Алим да быллай шартла келтиргенди: 2008 жылда республикада «Ана махтаулукъну» майдал къуралгъанды. Аны бла бирге он минг сом да бериледи. Он эм андан да аслам сабийни ёсдюргенлеге уа микроавтобус бериледи. Майдал къуралгъанлы Къабарты-Малкъарда аны бла 2021 жылгъа дери 365 тиширыу саугъаланнганды.Аладан къыркъ бирине «Газель» микроавтобусла берилгендиле. Республиканы бюджетинден ол жумушлагъа 44,5 миллион сом тёленнгенди.
Дагъыда беш эм андан да аслам сабийни ёсдюрген юйюрлеге жашау болумланы игилендириуге 250,0 мингишер сом тёленеди. Ол республиканы бюджетинден бир кере берилген социал болушлукъду.
Алим Орусбиевич «Сабийлери болгъанлагъа къырал пособияланы юсюнден» 1995 жылны 19 майында чыгъарылгъан 81-ФЗ номерли Федерал законнга кёре къаллай тёлеуле этилгенлерин да билдиргенди.
Зарема Дикинова жыл санлары сегизден онжетиге дери болгъанла ючюн ай сайын тёленнген ахчаны юсюнден хапарлагъанды: Пенсия фондну шартларына кёре, 2022 жылны 26 майына 48 519 заявление берилгенди. Аладан 13 405-сине кёре ахча тёленнгенди, 26 949-су къабыл кёрюлмегенди, 8165-си уа къараудадыла.
Жыйылыуну ахырында Людмила Федченко КъМР-ни Урунуу эмда социал министертвосу бла Пенсия фонд кёп иш тындыргъанларын чертгенди, алай бир ненча жумуш тынгылы тинтилмегенлерин да эсгертгенди. Сёз фатарны ортакъгъа алып тургъанлагъа хакъны жартысын къайтарыуну, ипотека процентлени азайтыуну, сабийге онсегиз жыл толгъунчу болушлукъ ахча тёлеуню, юч жыллары толмагъан сабийлеге хакъ алып къарагъан адамгъа айлыкъны, кёп сабийли аналагъа юйде ишлерча неда ишчи графиклерин тынчыракъ этерча мадарланы юслеринден барады.
Жыйылыуну ахырында Хазратали Бердов Жамауат палатаны 2022 жылны июнь айында ишлерини планы бла шагъырей этгенди.
Додуланы Мадина.
