Москвада КъМР-ни Башчысы Казбек Коков «Россети» ПАО-ну генеральный директору Андрей Рюмин бла ишчи тюбешиу бардыргъанды. Аны кезиуюнде республикада электросеть комплексни айнытыуну, активлени бирикдириуню онглары сюзюлгендиле эмда  жай солуу кезиу башланыргъа энергообъектле къалай хазырланнганларына къаралгъанды.
Казбек Коков «Россетини» таматасына Къабарты-Малкъарны экономикасына уллу магъананы тутхан проектлени бардырыугъа себеплик этгени ючюн жюрек ыразылыгъын билдиргенди. «Ышаннгылы эмда тутхучлу энергетикалы инфраструктура промышленностьну, туризмни, эл мюлкню, транспортну бла жол системаны айнытыуну баш амалларындан бириди. Инвестицияланы саны, адамланы жашау къолайлыкълары да ма анга кёре болгъанлары баямды», — деп,республиканы оноучусу, регионну  уллу электросеть компания бла бирге ишлеуюню магъанасы уллу болгъанын чертгенди.
«Жангы солуу кезиу башланырны аллында «Россети» курортланы объектлерин ток бла жалчытыугъа энчи эс бурады, контрольну бютюн къатыландырады.Нальчикни бла Элбрусну солуу юйлерин бла санаторийлерин ток бла жалчытхан подстанциялагъа алгъадан окъуна ремонт этилгенди. Аны бла бирге республиканы ток ызларыны ышаныулукъларын кючлендириу, жангыларын тартыу жаны бла ишни да селейтмейбиз. Быйыл ол ишлеге инвестиция халда 1,6 миллиард сом бёлюнюрюкдю. Тырныауузда аягъы юсюне этиле тургъан тау-магъадан комбинатны инфраструктурасын къурау баш борчларыбыздан бириди», - дегенди Андрей Рюмин. 
Ушакъны кезиуюнде электроэнергияны къоранчларын азайтыу жаны бла ишни андан ары бардырыргъа кереклисини юсюнден да айтылгъанды. 2020 жылдан башлап республиканы шахарларында бла эллеринде  «акъыллы» эсеплеучю приборладан 37 мингден артыгъы салыннганды, шартланы жыйыучу устройстволадан да 668-си тохташдырылгъанды.
Тюбешиуде бирге ишлеуню андан ары бардырыуну планлары да сюзюлгендиле.