БАДЗЭУЭГЪУЭ МАЗЭР КЪЭСЫХУБгы-лыжэ спортым дихьэххэм я зыгъэпсэхугъуэ лъэхъэнэр щиухынур бадзэуэгъуэм и 3-м нэсыху ягъэIэпхъуащ. Апхуэдэ унафэ иджыблагъэ къыщащтащ Къэбэрдей-Балъкъэр Республикэм и «Iуащхьэмахуэ» курортым. Мы щIымахуэ спорт лIэужьыгъуэм дихьэххэм папщIэ хаша Гарабаши-Мир гъуэгур ди къэралым и щIыпIэ нэхъ лъагэ дыдэхэм хеубыдэ. Абы зыщызыгъэпсэхухэм кIапсэ гъуэгум и уасэмкIэ худачых икIи абонементхэр нэхъ пуду иращэ. Иджыпсту лыжэ къэжыхьыпIэм уэсышхуэ телъщ икIи абы пщэдджыжь нэхулъэм щегъэжьауэ зыщагъасэ бгы-лыжэ спортымкIэ урысей командэ къыхэха зыбжанэм хэтхэм. Пэжщ, курортым и лэжьыгъэр къыгуэхыпIэ имыIэу дунейм и щытыкIэм пыщIащ. ЗыгуэркIэ зэуэ хуабэ хъумэ, лыжэ къэжыхьпIэхэр нэхъ пасэу зэхуащIынкIэ хъунущ. Ауэ лэжьыгъэхэм я екIуэкIыкIэр илъэс зыбжанэм тещIыхьауэ къапщтэмэ, мы гъэми уэсыр куэдрэ телъыну ущыгугъ хъунущ. Псалъэм папщIэ, щIымахуэ зыгъэпсэхугъуэр нэгъабэ махуэ 240-кIэ екIуэкIащ икIи ар щиухар бадзэуэгъуэм и 4-рщ.
Поделиться: ЧИТАТЬ ТАКЖЕ:
|