КъБР-м и Парламентым Экономикэ политикэмкIэ, зыужьыныгъэмрэ хьэрычэт IуэхумкIэ и комитетым и зэIущIэм иджыблагъэ щытепсэлъыхьащ республикэм хьэрычэт Iуэху мащIэмрэ курытымрэ зэрызыщаужьым.
ЗэIущIэм хэтащ КъБР-м и Парламентым и УнафэщIым и къуэдзэ Жанатаев Сэлим, КъБР-м промышленностымкIэ, энергетикэмрэ сатумкIэ и министр Iэхъубэч Щамил, депутатхэр, министерствэхэм, жылагъуэ зэгухьэныгъэхэм я лIыкIуэхэр, хьэрычэтыщIэхэр.
Жанатаев Сэлим къаIэта Iуэхум и мыхьэнэр къыхигъэщащ икIи къызэхуэсахэм ягу къигъэкIыжащ гъатхэпэм и 5-м республикэм и экономикэ, социальнэ зэпIэзэрытыныгъэм теухуа лэжьыгъэр гъэзэщIэнымкIэ зэзыгъэуIу штабыр Къэбэрдей-Балъкъэрым и Iэтащхьэм и унафэкIэ къызэрызэрагъэпэщар. КъищынэмыщIауэ, накъыгъэм и 5-м къащтащ Къэбэрдей-Балъкъэрым и экономикэ зыужьыныгъэм дунейпсо политикэмрэ санкцэхэм къаша лъэпощхьэпохэмрэ зэран хуэмыгъэхъуным хуэгъэза Iуэхугъуэ нэхъыщхьэу 70 къыщыгъэлъэгъуа дэфтэрыр. Ахэр 2022 гъэм и кIэ пщIондэ ягъэзэщIэн хуейщ.
Экономикэ политикэмкIэ, зыужьыныгъэмрэ хьэрычэт IуэхумкIэ и комитетым и унафэщI Iэпщэ Заур жиIащ хьэрычэт Iуэху мащIэмрэ курытымрэ щIэгъэкъуэн ямыIэу, сыт хуэдэ щIыналъэ къапщтэми, абы и экономикэм зэрызимыужьынур. Къэпсэлъам къызэрыхигъэщамкIэ, Къэбэрдей-Балъкъэрым гулъытэшхуэ щыхуащI хьэрычэт Iуэху мыинри курытри зэрырагъэфIэкIуэнум.
Iуэхур зытетым теухуауэ зэIущIэм къыщыпсэлъащ КъБР-м экономикэ зыужьыныгъэмкIэ и министрым и къуэдзэ Белецкая Ольгэ.
Зыуэ щыт реестрым къызэрыщыгъэлъэгъуамкIэ, накъыгъэм и 10-м ирихьэлIэу, хьэрычэт Iуэху мащIэмрэ курытымрэ йолэжь цIыху 19679-рэ: хьэрычэтыщIэу 14366-рэ, IуэхущIапIэу - 5313-рэ. Хьэрычэт Iуэху мащIэмрэ курытымрэ пэрытым, хьэрычэтыщIэхэмрэ зи щхьэ телэжьэжхэмри абыхэм яхэту къапщтэмэ, псоми я бжыгъэр 2022 гъэм щIышылэм и 1-м ирихьэлIэу цIыху 58702-рэ мэхъу. Дызэрыт илъэсым накъыгъэм и 1-м къызэрапщытамкIэ, цIыху мин 30-м щIигъум къагъэсэбэп «И лэжьыгъэм къыпэкIуэ налог» тыкIэр. Абыхэм ящыщу цIыху 29 367-р я щхьэ телэжьэжхэращ, адрейхэр - хьэрычэтыщIэщ.
Белецкая Ольгэ тепсэлъыхьащ Къэбэрдей-Балъкъэрым хьэрычэт Iуэху мащIэмрэ курытымрэ защIэгъэкъуэным теухуауэ щащIэм.
Къэпсэлъам зэрыжиIамкIэ, 2022 гъэм «Хьэрычэт Iуэху мащIэмрэ курытымрэ, хьэрычэтыщIэхэм защIэгъэкъуэным и IуэхукIэ» лъэпкъ проектым сом мелуани 139,9-рэ хухахащ: федеральнэ бюджетым щыщу сом мелуани 138,5-рэ, республикэм и мылъкуу - сом мелуан 1,4-рэ. КъБР-м Экономикэ зыужьыныгъэмкIэ и министерствэм игъэзащIэ Iуэхухэм сом мелуан 67,3-рэ тещIыхьащ, КъБР-м Мэкъумэш IэнатIэмкIэ и министерствэм - сом мелуан 72,6-рэ.
Санкцэхэр зэран щыхъу зэманым щIалэгъуалэ хьэрычэт Iуэхум зэрызыщIагъакъуэ Iэмалщ зи ныбжьыр илъэс 14 - 22 хъухэм ящыщу я лэжьыгъэм къыпэкIуэ хэхъуэм техьэ налогыр зэрыщхьэщатыкIыр къэзыгъэлъэгъуахэм мазэ къэс зэрагъэгушхуэ онлайн-акцэр. Къапщтэмэ, 2022 гъэм и кIэ пщIондэ сом мини 100 зырыз щагъэувыну Iуэхугъуэ 40 ирагъэкIуэкIынущ.
Белецкая Ольгэ къытеувыIащ КъБР-м и ШэсыпIэ фондыр, «КъБР-м хьэрычэт Iуэху мащIэмрэ курытымрэ кредит мащIэ езыт фондыр», «Хьэрычэт мащIэмрэ курытымрэ я корпора-цэр» зэлэжь Iуэхухэми. Абы жиIащ экономикэм епхауэ лажьэ IуэхущIапIэхэр къызэрапщытар икIи абы къызэригъэлъэгъуамкIэ, 2022 гъэм и япэ мазищым лэжьыгъэхэр хуэдэ 1,7-кIэ нэхъыбэу ягъэзэщIащ. Псалъэм папщIэ, экспорт Iуэхухэр 2021 гъэм и апхуэдэ пIалъэм елъытауэ, процент 18,6-кIэ нэхъыбэщ.
Къэбэрдей-Балъкъэрым и зыужьыныгъэм хуэгъэза Iуэхухэм мылъку къыхегъэлъхьэнымкIэ ирагъэкIуэкI лэжьыгъэм къыщытеувыIэм, Белецкая Ольгэ къыхигъэщащ абы теухуауэ «КъБР-м и инвестицэ Iуэхухэм ятеухуауэ» республикэ Закон №23-мрэ нэгъуэщI хабзэхэмрэ зэрыщыIэр. Абыхэм къыщыгъэлъэгъуахэм тету, инвестицэ проект 11-мкIэ IуэхущIапIэу 10-м я мылъкум техьэ налогымкIэ худэчыххэр яIащ. Абыхэм япкъ иткIэ, республикэм и экономикэм инвестицэу сом мелард 16,5-рэ къыхрагъэлъхьэфащ.
Къэбэрдей-Балъкъэрым инвестицэ проектхэр щыгъэзэщIэным хуэгъэзауэ ахъшэ щIыхуэ етын папщIэ, УФ-м ФинансхэмкIэ и министерствэм къиутIыпщащ сом меларди 2,9-рэ.
ЗэIущIэм щытепсэлъыхьащ «КъБР-м зыужьыныгъэмкIэ и IуэхущIапIэхэр» АО-м и лэжьыгъэм. Ар 2006 гъэм къызэрагъэпэщауэ щытащ. 2021 гъэм IуэхущIапIэм и нэIэм щIэтащ сом мелард 14,5-рэ зи уасэ проект 40.
Къэпсэлъар къытеувыIащ КъБР-м и ШэсыпIэ фондыр хэту, промышленностым елэжьхэм зэрадэIэпыкъумрэ «Кавказ Ищхъэрэ федеральнэ щIыналъэм и зыужьыныгъэр» федеральнэ программэм ипкъ иткIэ къэралым инвестицэ Iуэхум зэрызригъэужь Iэмалхэмрэ. Иужьрейм теухуауэ Белецкэм къыхигъэщащ 2016 гъэм къыщыщIэдзауэ 2020 гъэ пщIондэ а къэрал дэIэпыкъуныгъэм и фIыгъэкIэ инвестицэ проект ину 10, сом меларди 3,5-рэ текIуадэу, зэрагъэзэщIар.
Къэбэрдей-Балъкъэрыр илъэс къэс жыджэру хэтщ ПроектыщIэхэр кIуэцIрыгъэкIынымкIэ агентствэм УФ-м и щIыналъэхэм я инвестицэ Iуэхухэр зыщыхуэ-дэр къигъэлъагъуэу иригъэкIуэкI Лъэпкъ рейтингым. Апхуэдэу 2021 гъэм зи Iуэхухэр нэхъыфI щIыналъэ 40-м хэхуащ ди республикэр.
КъБР-м зезыгъэужь корпорацэм и лэжьыгъэм тепсэлъыхьащ IуэхущIапIэм и генеральнэ унафэщI Чочаев Ахъмэт. Хьэрычэт Iуэху мащIэмрэ курытымрэ я зыужьыныгъэм санкцэхэр зэран зэрахуэхъу щIыкIэмрэ а IэнатIэхэм защIэгъэкъуэнымкIэ щIыналъэм къыщагъэсэбэп Iэмалхэмрэ я гугъу ищIащ ХьэрычэтыщIэхэм я хуитыныгъэхэр хъумэнымкIэ уполномоченнэм и лIыкIуэу КъБР-м щыIэ Кербиевэ Мадинэ. И Iуэху еплъыкIэр зэIущIэм къыщигъэлъэгъуащ Хьэрычэт Iуэху мащIэмрэ курытымрэ тегъэщIа «Опора России» урысейпсо жылагъуэ зэгухьэныгъэм и щIыналъэ къудамэм и уна-фэщI Къылъшыкъуэ Альберт. Абы къыхигъэщащ коронавирусым зыщиубгъу зэманым КъБР-м и Правительствэм къэралым щыIэ дэIэпыкъуныгъэ псори и чэзум къызэригъэсэбэпар икIи ахэр зэригъэзэщIамкIэ республикэм 14 - 15-нэ увыпIэхэр Урысейм щиIыгъщ. Къэпсэлъам къыхигъэщащ лъэпощхьэпохэм зэращыщыр хьэрычэт Iуэху мащIэмрэ курытымрэ ират кредитым зэрыкIэрыхуар.
Апхуэдэуи зэIущIэм къыщыхагъэщащ республикэм хьэрычэт Iуэху мащIэмрэ курытымрэ къыщызэзыгъэпэщхэм я бжыгъэр нэхъ мащIэ зэрыщыхъуар. ЩытыкIэр ирагъэфIэкIуэжын папщIэ, апхуэдэхэм я лэжьыгъэр тэмэму зэрырагъэкIуэкIыну Iэмалхэр къахузэгъэпэщын хуейщ. Депутатхэр тепсэлъыхьащ Тырныауз вольфрам-молибден къыщIэхыпIэр ухуэным, Налшык къалэм и «КъуэкIыпIэ», «Мей» хьэблэщIэхэм ухуэныгъэхэр щегъэкIуэкIыным, Шэджэм районым щIы гектари 100 къызэщIэзыубыдэ хуабэщ зэрыщащIынум теухуа проектхэр зэрагъэзащIэм, нэгъуэщIхэми.
ЗэIущIэм щыжаIахэр къэлъытауэ, республикэм и министерствэхэмрэ IуэхущIапIэхэмрэ зэлэжьынухэр къыщыгъэлъэгъуа унафэр къащтащ.
Белгъэрокъуэ Марьянэ.