Тырныауузда вольфрам-молибден комбинат ишлеген кезиуде, заранлы къалгъан-къулгъанланы бир жерге тёгюп тургъандыла. Энди уа аны тазалау барады. Республиканы Табийгъат байлыкъла эмда экология министерствосунда айтханларына кёре, ол затла 1-4-чю класслы къоркъуулугъа саналадыла. Кеслери да 3,6 гектар жерни аладыла.
Тазалау ишлени Табийгъатны къоруулау объектлени ишлеу эмда аланы хайырланыу жаны бла дирекция «Таза къырал» федерал проектни чеклеринде бардырады. Шёндю анда къалгъан-къулгъанланы машиналагъа жюклеп, кир-кипчик жыйылыучу полигоннга ташыйдыла.
Тийрени тазалап бошагъандан сора, ызы бла тап жарашдырлыкъдыла: топуракъ жайып, кёпжыллыкъ кырдыкланы урлукъларын себерикдиле. Алай этилсе, ол жерни артда жангыдан хайырланыргъа боллукъду.
Тазалау ишле чурумсуз, кеслери да графикден кеч къалмай барадыла, дегендиле министерствода.
Омарланы Мурат
хазырлагъанды.