Къабарты-Малкъарны Экономика айныууну министерствосуну «Мени документлерим» кёп функциялы арасы Къашхатауда 2015 жылда ачылгъанды. Бусагъатда анда онжети адам ишлейди. Черек районну эллеринде да араны биришер специалистлери барды.
Араны ишчиси Аттасауланы Джамиля: «Биринчи адамла бизни организациябыз нек ачылгъанын ангыламай тургъандыла, аны ачыкъ айтханла да чыкъгъандыла. Алай артда кеслери кёргендиле: тюрлю-тюрлю организациялагъа барып, заманларын, ахчаларын къоратхандан эсе, битеу жумушларын да бир жерде тамамлагъан бек игиди. Бусагъатда сау болугъуз деп, жамауат ишибизге ыразылыгъын билдиреди», - дегенди.
Ара тюшде окъуна тёрели сагъатха окъуна жабылмайды, ишчилени бир къаууму онекиден-бирге, экинчи къаууму уа бирден экиге солугъанлары себепли, хар келген керекли специалистни табады.
Аттасауланы Джамиля, Азаматланы Марина, Шунгарланы Лариса жаш адамладыла, болсада ариу сёлеше биледиле. «Бизге келгенле барысы да ышара-ышара атламайдыла босагъабыздан, хау, асламысы низамлыладыла, алай жумушлары тюзюнлей бир минутха тамамланырыгъын излегенле да тюбейдиле. Ала барысы да бизни адамларыбыздыла, специалистни борчу – хар бирине да тап сёлеширге, болушургъады. Бир айтханыбызны кёп кере къайтарыргъа да тюшеди, ангылатабыз хар затны, къырал аны ючюн къурагъанды араны», - дейдиле къызла.
Бизни республиканы битеу районларында МФЦ-лада ишлегенлени интернет-сеть къауумлары барды, къыйын соруу чыкъса, анда сорургъа, жууап табаргъа да болады. Не десек да, былайда окъуна кёрюнюп турады: социальный сетьлени, интернетни магъанасы, хайыры да шёндюгю дунияда бек уллуду.
«Мени документлерим» деген арада тыш къыраллы паспортла жарашдырыладыла, машина жюрютюрге эркинлик къагъытланы алышадыла, прописка бла байламлы битеу сорууланы да мында жалчытыргъа онгла бардыла. Дагъыда бизнес бла кюрешгенлени документлери, медицина полисле, Пенсия фонд, Росреестр, юйюр болум жаны бла справкала – ала бла байламлы соруулагъа да къарайдыла. Къысхасы, адамла ары-бери чапмай, абызырамай, бери келип, эки-юч жумушларын да тамамлайдыла.
Къашхатауда «Мени документлерим» деген арада ишлегенле, ариу тиллиле, жарыкъ бетлиле болгъанларындан сора да, бек жууаплы адамладыла. Пандемияны кезиуюнде, белгилисича, кёп организация жабылгъан эди, алай бу ара уа ишин тохтатмагъанды.
Мында ишлегенле бла «Заман» газетни юсюнден да хапарлашханбыз. Жаш специалистле тилибизни болумуна, таулу сабийлени араларында аны билмегенлени саны ёсгенине бек жарсыгъандыла. «Школда устазыбыз дерсликде текст бла ишлегенден сора, бош заманыбыз къалса, «Заман» газетни окъурукъбуз, деучю эди, - дейди Аттасауланы Джамиля. – Алай терк окъуп чыгъа эдик ол борчлу текстни! Сора устазыбыз «жашау халла» рубрикада хапарланы окъуй эди. Тепмей тынгылагъанбыз».
Байсыланы Марзият.
