Эм усталагъа бла тирилеге – майдалла бла дипломла

Саулукълары бла байламлы чекленнген онглары болгъанланы арасында профессионал усталыкъны «Абилимпикс» деген ат бла бардырылгъан алтынчы регион чемпионаты къууанчлы халда жабылгъанды. Ол эки  кюнню баргъанды. Анга республиканы кёп районларындан, шахарларындан эмда Шимал Осетия-Аланиядан, Ингушетиядан, Чеченден, Дагъыстандан келечиле келген эдиле.

Конкурсантланы барысына да бирча заман бёлюннгенди. Кийимле тигиу, темирле жалгъау, аш хазырлау, агъач бла ишлеу, машиналагъа ремонт этиу, къурулуш, спорт,  робототехника жаны бла кюрешгенлени бла устазланы ишлерине  ючюшер-тёртюшер эксперт къарап тургъанды. Эришиулеге къатышханланы асламысы алагъа буюрулгъан борчланы тынгылы толтургъандыла. 
Геуюрге кюн алчыла къууанчлы халда саугъаланнгандыла. Аланы алгъышларгъа КъМР-ни Жарыкъландырыу, илму эмда жаш тёлюню ишлери жаны бла министри Анзор Езаов,  республиканы   башха министерстволарыны бла  ведомстволарыны, тюрлю-тюрлю биригиулени, иш бериучюлени, чемпионатны  партнёрларыны, республиканы билим бериу учрежденияларыны таматалары  да келген эдиле.
Хычыуун жумушну  башлай, Анзор Езаов  бек алгъа чемпионатны къурагъанлагъа, анга къатышханлагъа да жюрек ыразылыгъын билдиргенди. «Бу жашланы бла къызланы ишлегенлерин кёрюп, сукъланып тургъанма. Болсада  чемпионат бошалып къалмагъанын, ол мындан ары да бардырыллыгъын айтыргъа сюеме. Ол къуралыулу бардырылыр ючюн кёпле тийишли юлюшлерин къошхандыла. Эм уллу къыйынны уа бу жаш адамланы юйретгенле салгъандыла, алагъа уллу ыспас этеме», – дегенди. 
Ызы бла министр школчуланы  араларында «Аш-азыкъ хазырлау» деген къауумда хорлагъанланы саугъалагъанды. Бу жаны бла  айырмалылагъа Аппайланы Астемир,  Мызыланы Салима, Валерия Сасикова саналгъандыла. 
КъМР-ни урунуу эмда социал къоруулау министри Асанланы Алим да кесини алгъыш сёзюнде, жаш адамланы эришиуледе къармашханларын кёргенинде, ала тутхан ишлерини усталары болгъанларына тюшюннгенин айырып айтханды, жашауларында бютюн уллу хорламлагъа жетерлерин сюйгенин билдиргенди. Андан сора ол «Сатыу-алыу» жаны бла эришиуде алчы болгъанланы саугъалагъанды. 
Спортда айырмалыланы  «Спорт-адаптив школну» башчысы  Александр Кулюшин сертификатла, дипломла, майдалла бла да белгилегенди. Саугъаланнганланы араларында Мокъаланы Зарема,  Маммеланы Алийхан да болгъандыла.
Автомобильлеге ремонт этиу эмда жумушларын толтуруу жаны бла  керти да уста болгъанларын кёргюзтгенлени араларында уа  Атабийланы Армау, Боллуланы  Абдулкерим, Сабанчыланы Имран, Отарланы Таулан  да болгъандыла. «Медицина эмда социал болушлукъ бериу» номинацияда алчыланы санында Геккиланы Алина, конкурсну «Къургъакъ къурулуш эмда штукатур ишле» деген кесегинде уа   Асланланы Мусса бла Залийханланы Ислам да алгъа чыкъгъандыла.
«Дюгерли хычинле» жаны бла уа Эндрейланы Виктория эм усталадан бирине саналгъанды, «Школгъа дери юйретиу» бёлюмде Жабелланы Оксана да белгиленнгенди, «Башланнган класслада устазланы» араларында Чапаланы Патимат, «Администрирование без данных» деген компетенцияда хорлагъанланы санында Додуланы Сергей бла Отарланы Астемир, «Веб-дизайнда» Таукенланы Роксана да саугъалагъа тийишли кёрюлгендиле.
Конкурсда хорлагъанлагъа дипломла, майдалла да берилгендиле. Хорлам болдурургъа аз къалгъанланы да къуру къоймагъандыла – алагъа сертификатла берилгендиле
Жаш адамланы тенглери уа, тепсеп, жырлап да, чемпионатны къууанчлы  жабылыуун бютюн жарыкъ, эсде къалырча этгендиле.

Холаланы Марзият.
Суратланы автор алгъанды.

Поделиться:

ЧИТАТЬ ТАКЖЕ:

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.

28.03.2024 - 09:03

ИНВЕСТИЦИЯЛАГЪА – ЭНЧИ ЭС

Жангы предприятияла къурарча, производствону кенгертирча, инвестицияла этмей, башхача айтханда ишге ахча салмай боллукъ тюйюлдю.

27.03.2024 - 14:04

КЪАБАРТЫ-МАЛКЪАР РЕСПУБЛИКАНЫ БАШЧЫСЫ К.В.КОКОВНУ РОССЕЙ ФЕДЕРАЦИЯНЫ МИЛЛЕТ ГВАРДИЯСЫНЫ АСКЕРЛЕРИНИ КЮНЮ БЛА АЛГЪЫШЛАУУ

Росгвардияны Къабарты-Малкъар Республикада Управлениясыны хурметли аскерчилери, ишчилери эмда ветеранлары! Сизни Россей Федерацияны Миллет гвардиясыны аскерлерини кюню бла алгъышлайма!

27.03.2024 - 09:07

САКЪАТ САБИЙЛЕ ОКЪУУСУЗ КЪАЛМАЗЧА

Къабарты-Малкъарны Жамауат палатасында республиканы билим бериу учреждениялада сакъат эм къыйын ауругъан сабийлени окъутуу не халда болгъаны тинтилгенди.