Оюнну ахырына дери сакъланнганды сейирликГеуюрге кюн Санкт-Петербургда дунияны футболдан чемпионатыны биринчи жарым финал тюбешиую ётгенди. Ол бу мундиальны бек кючлюге саналгъан Францияны бла Бельгияны командаларыны араларында бардырылгъанды. Оюннга къараргъа Францияны президенти Эмманюэль Макрон да келген эди.
Бу матчны магъанасы уллу болгъаны себепли эки къаууму да сермешни чабыууллукъладан башлагъан эдиле. Аны бла бирге ала къорууланыуну да кёзден ычхындырмай эдиле. Топну сыйыргъанлай, командала терк окъуна бир бирлерини къабакъ эшиклери таба жан ата эдиле. Тюбешиу спортну бу тюрлюсюн сюйгенлени сейирлерин къозгъай ётгенин специалистле да белгилегендиле. Болсада биринчи таймда командала, не кюрешген эселе да, эсепни тюрлендиралмай, солургъа къурлай кетген эдиле.
Оюнну экинчи кесеги уа французлуланы гол уруулары бла башланнганды. 51-чи минутда Самуэль Умтити, мюйюшден берилген топну башы бла уруп, Белгияны командасыны къабакъ эшиклерине кийиреди. Алай бла эсеп 1:0 болады.
Тюбешиуню саулай алып сюзгенде, топну Белгияны командасы аслам заманны тутханды. Ол кёрюмдю 61 процент болады. Алай берилген онгланы бла стандартланы ала тап хайырланалмагъандыла эм, не бек кюрешген эселе да, эсепни тенг эталмагъандыла. Аны себепли экинчи жарым финал сермешде ким хорлатса да, ала бла ючюнчю жер ючюн ойнарыкъдыла.
Материал басмагъа жарашдырылгъан кезиуде Англияны бла Хорватияны араларында тюбешиу башланмагъан эди.
Поделиться: ЧИТАТЬ ТАКЖЕ:
|