Мындан арысында Минги тауда фрирайд бла кюрешгенлеге эм анга кётюрюлюрге сюйгенлеге бир кесек къоркъуусузуракъ боллукъду. Аны юсюнден «Кавказ.РФ» акционер обществону пресс-службасындан билдиредиле. Аны болушлугъу бла тауда къыйын болумгъа тюшгенлени белгилеу жаны бла энчи система къураллыкъды. «Системы позиционирования и поиска» деген автоном излеу системаланы «Resero.tech» деген ата журтлу производитель чыгъарлыкъды. Аны таматасы Дмитрий Гавва бла «Кавказ.РФ» обществону башчысы Хасан Тимижев бу кюнледе келишимге къол салгъандыла.
- Солургъа тауланы сайлагъан хар адамны да хурметин кёре, биз аланы къоркъуусузлукъларына энчи эс бёлюуню тюзге санайбыз. Къыйын болумгъа тюшгенлеге бек биринчиден къутхарыучуларыбыз атланадыла да. Аланы ишлерин тынчыракъ этиу а баш борчладан бириди. Ол себепден жангы системаланы кийириуню сылтауу андады, - деп чертгенди Хасан Тимижев.
Къыйын болумгъа тюшгенни жашауу аны къачан табарыкълары бла къаты байламлыды. Заман не аз къоратылса, ол къадар игиди. Аны себепли жууукъ кезиуде туристле аллай маячокланы хайырланыргъа неда сатып алыргъа боллукъдула. Аны бла, «sos» режимсиз окъуна адамны табар онг барды. Ол а, сёзсюз, ахшы болушлукъ этерикди къутхарыучулагъа. Система сетьден чыкъса окъуна, вертолётдан аны тапхан тынч боллукъду.
«Resero.tech» организацияны таматасы Дмитрий Гавва билдиргеннге кёре, бек алгъа ала сетьни сынау халда Минги тауну къыбыла жанында хайырланып башларыкъдыла. Аны къалай ишлегенине кёре уа шимал жанына да кёчерикдиле.
Таппасханланы Аминат.