Хасанияда 21-чи номерли сабий садха токъсан сабий жюрюйдю. Алагъа мында хар жаны бла да тап онгла къуралгъандыла.
Аны мекямы  назы, къоз, къайын  тереклеге, юлкюлеге, гюллеге да батылыпды. Арбазында уа  балачыкъла эшикге чыкъгъанда солурча, агъачдан ишленнген  тюрлю-тюрлю юйчюкле, жапмачыкъ, дагъыда сабийлени айныуларына керекли эмда жараулу башха затла бардыла. 
Бери жюрюген къызчыкъланы бла жашчыкъланы мектепге хазырлаугъа да аслам эс бёледиле. Ол жумушну билимли эм жууаплы юйретиучюле бардырадыла. Ала кеслери да энчи амалланы хайырланадыла. Сёз ючюн, дерсни кезиуюнде сабийле стол артында  угъай, ким къайда сюйсе да олтуруп тынгылайдыла. Аллай дерследе ала  эрикмейдиле.
«Тейри къылыч» эмда «Сабийлик» деген программалагъа  кёре экология дерсле да бериледиле. Мында анга деп энчи кабинет да барды. Андан сора да, «Жаз башы келеди – не болду?», «Жайда уа сабийле не ишлейдиле?», «Кюз артында уа  чапыракъла къаллайла боладыла?», «Къышны уа не белгиси барды?» дегенча окъуула да бардырыладыла. 
Мында балачыкъланы саулукъларын кючлендириуню къайгъысын да кёредиле. Аэробика дерсле бардырыладыла, гимнастика кружокла да ишлейдиле.
Сабийлени ашха ачар мурат бла, аланы таза хауада иги кесек айландырадыла. Ашларында да витаминле кёп болуруна къайгъырадыла. 
Бу учрежденияда Гасыланы Люданы башчылыгъында шуёх коллектив ишлейди. Хар бири  борчун бет жарыкълы толтурады. Юйретиучюле  Улбашланы Люсяны, Чочайланы Халиматны,  Солтанланы Жамиляны, Къазакъланы Жаннаны, аш хазырлаучу Улбашланы Фатиматны, медсестра Агайланы Иринаны, дагъыда башхаланы атларын энчи белгилерчады. 

Холаланы Марзият