Мариям Оришева Тырныауузну В.Г. Кузнецов атлы 6-чы номерли орта школуну башланнган классларыны устазыды. Нёгерлери, аны юсюнден айта, ол ишин билген, сабийлени сюйген педагог болгъанын чертедиле.

Алай Мариям Данияловна бу усталыкъгъа алай терк келмегенин белгилейди. Школдан сора ол Къабарты-Малкъар къырал университетни Филология факультетини ингилиз тилден бёлюмюне, ызы бла уа Къабарты-Малкъар экономика-право лицейге киргенди, анда «Право эм социал жалчытыуну къурау» деген специальностьха окъугъанды. Аны бла да чекленмей, 3-чю номерли профессионал училищеде электрон-тергеучю машиналаны операторуну усталыгъын алгъанды, Элбрус регион колледжни «Башланнган классланы окъутуу» деген бёлюмюн къызыл дипломгъа бошагъанды. Аны бла тенг Москваны «Бизнесни миллет институтунда» «Юриспруденция» жаны бла окъуп, «Бакалавр» квалификацияны алгъанды.

Урунуу жолуму Тырныауузну Ара район больницасында кадрла бёлюмню специалисти болуп башлагъанма, - дейди Мариям Данияловна. -Андан сора «Окна Берта» компанияны менеджери болгъанма, Элбрус регион колледжде юридический предметледен дерсле бергенме. Тепсеуле бла профессионал халда кюрешгенме. Алай бу усталыкъланы биринде да зауукълукъ сезмегенме, ала меники болмагъанларын ангылагъанма. Биологиядан устазым, ишин теренинден билген, жюреги бла сюйюп, кёп жылланы анга къуллукъ этген Созайланы Назир Мыртаевични: «Къайсы усталыкъны сайласагъыз да, аны сюйюгюз, алайсыз ишигиз барлыкъ тюйюлдю», - деген сёзлери бюгюн да эсимдедиле. Жюрегим ырахат, ыразы болгъан ишни тапхынчы, кесими кёп тюрлю усталыкъда сынагъанма. Инсан ишини эсеплерин кёрюрге керекди, школда уа ала шарт билинедиле.

Колледжден сора устазлыкъ ишин Мариям Оришева Кёнделенни Доттуланы Ахматны атын жюрютген мектебиндебардыргъанды, анда 5-11-чи класслада тарыхдан бла обществознаниядан дерсле бергенди. «Огъурлу коллектив, билим алыргъа сюйген окъуучула – бу иш манга уллу насып келтиргенди. Алай юйюр бла байламлы болумла чырмау этгендиле, хар кюнден Кёнделеннге башха жерден барып окъутургъа онг жокъ эди.

Ол чакъда Тырныауузну 6-чы номерли школуна башланнган классланы устазы болургъа чакъыргъандыла. Хау, ал кезиуде гитче сабийле бла бир тил табалырмамы, жангы коллектив бла арам къалай къуралыр деп арсарлы бола эдим. Алай классха кирип, биринчи дерсими бергенлей, ол ишеклик толусунлай чачылгъанды, бу иш мени ючюн жаратылгъанча сезим туугъанды. Школну директору Къартлыкъланы Зульфия Тахировнагъа кесиме жангы болумлада айныргъа эм ишлерге онг бергени ючюн чексиз ыразыма», - дейди ол.

Мариям Оришева айтханыча, мектепни коллективине бийик билимли педагогла киредиле, не тюрлю сорууунга да аладан жууап табаллыкъса, юйреналлыкъса. Хар бири да болушургъа, билмеген жеринги ангылатыргъа, билеклик этерге хазырдыла. «Уллу билими, сынамы болгъан Анахаланы Раиса Юсуповнаны кесими насийхатчыма санайма, аны къадары устазны усталыгъы адамны саулай да жашауун жарытхан иш болгъанына юлгюдю. Школубузну педагогларыны юслеринден кёп айтыргъа боллукъду, Наталья Ивановна Давыденко, Джаппуланы Мадина Шамилевна, Татьяна Николаевна Рюмина, Будайланы Лиза Таукановна, Ахматланы Людмила Хакимовна – аланы барысындан да кёп затха юйренирге боллукъду, бу жаны бла насыбым бек тутханды», - дейди устаз.

Мариям Данияловна анда окъугъан хар сабийге жюрекден къайгъырады, ала орта класслагъа ётерге тынгылы хазырланыр ючюн билимин, усталыгъын да аямайды. Гитчеле да, устаз аланы сюйгенин сезе, кеслери да анга тартыладыла. Сёз ючюн, окъуучусу Аль-Карим Шеймерденов, юйге кетерден алгъа, анга келип берген дерслери ючюн ыразылыгъын билдиреди, Малкъарланы Зурият а «мама» деп окъуна айтады. Карина Карданова, эрттенликде школгъа келгенлей: «Сиз бюгюн къалай ариусуз», - деп тюбейди. Окъуучуларыны юслеринден айта, устаз да сабийле бир бирлерине ушамагъанларын, барысы да кесича энчи болгъанларын, алай аланы сюймезге жарамазлыгъын белгилейди.

Дерсле бюгюнлюкде Башланнган билим бериуню федерал къырал стандартына кёре бериледиле. Мариям Данияловна окъутууда актив эм интерактив амалланы хайырланады, алагъа кёре юйретиуде устаз, окъуучула да тенгдиле, бир жердедиле. Алай бла гитчеле дерсни бардырыугъа къатышадыла, аны юсю бла баш борч – сабийни окъургъа юйретиу – тамамланады.

- Сабийлени болумну, сорууну тинтирге, анга кесамат кёзден къараргъа, керекли информацияны кеслери излей билирча этерге тийишлиди, - дейди

Ёсе келген тёлюле поэтика сёзню ариулугъун ангыламагъанлары жарсытады. Бу халны тюзетир умут бла гитчелени терк окъургъа юйретеме. Алагъа В.И. Ленин бла М. Горький къалай терк окъугъанларын, Н.Г. Чернышевский бир жолгъа окъугъан, жазгъан да этгени юлгюге келтиргеним, сейирлерин къозгъагъан эди. Ол мурат бла Шультени таблицаларын, калибровочный текстлени, адамны эсин кючлеген эм мыйыны айнытхан упражненияланы хайырланама.

Сабийле кеслери да быллай дерслени жаратадыла, терк эм шатык окъуп башлагъанларын кеслери да эслейдиле, окъугъанларын суратлагъа кёчюргенлери уа текстни ангыларгъа себеплик этеди. Биз школубузда бардырылгъан битеу конкурслагъа, викториналагъа къатышабыз.

uchi.ru билим бериу платформагъа къатышханыбыз ючюн кёп грамота эм ыразылыкъ къагъыт бла саугъаланнганбыз.
Быйыл Мариям Оришеваны выпуску жокъду, ол сабийле бла айырылыргъа кеси да ашыкъмайды. «Бизге алыкъа кёп затны билирге керекди, сабийлени сюйгенме, ала да мени излегенлерин сеземе. Тамамлагъан ишимден кюн сайын уллу насып табама, аны кесиме уллу саугъагъа да санайма», - дейди.

Анатолий ТЕМИРОВ.