Тюнене Къабарты-Малкъарны шахарларыны бла эллерини школларында ахыр къонгуроугъа жораланнган къууанчлы линейкала ётгендиле. Быйыл республикада 11-чи эмда 9-чу классланы 12 минг бла жарымдан аслам жаш бла къыз бошагъандыла.
КъМР-ни Башчысы Казбек Коков Прохладна районда Солдатская станицада школну бошагъанланы алгъышларгъа баргъанды. Къууанчлы ишге районну жер-жерли самоуправление органларыны келечилери, школну тауусханланы аталары, аналары, жууукълары къатышхандыла.
– Сиз хар биригиз да жашауда тийишли жер табып, къыралыбызны керти инсанлары боллукъсуз, – дегенди Казбек Коков аланы алгъышлай, – Къыралда бюгюнлюкде жаш тёлюге фахмуларын ачыкъларгъа битеу онгла бардыла. Сюйген усталыкъны алып, мындан ары жашауда жетишимли болуругъузгъа ишексизме. Устазла уа магъаналы ишни толтурадыла. Сабийлеге билим берген бла бирге, ала не жаны бла да айныгъан адамланы ёсдюредиле. Аны ючюн сизге хурмет этебиз. Ата-аналагъа уа сабийлеригизни насыпларын кёрюрюгюзню тежейме.
Быйыл а Солдатская станицаны школуну 11-чи классын 19 жаш адам, 9-чу классын а 56 окъуучу бошагъандыла. Биринчи классха уа 94 сабий жюрюйдюле.
Школ 2021 жылда сентябрьде хайырланыргъа берилгенди, ол «Билим бериу» миллет проект чеклеринде ишленнгенди. Анда шёндюгю излемле сакъланнганларын айтырчады, окъуу отоулада, лабораториялада тийишли оборудование барды, актовый зал, китапхана ишлейдиле, техника ара барды, тюрлю-тюрлю кружокла къуралгъандыла, медицина ара, станоклары бла мастерскойла, спорт зал, тренерле солурча отоу, ашхана эм кёп башха жерле ишлетилгендиле. Жашланы бла къызланы жалгъан кырдык себилген футбол майданда ойнаргъа, волейбол, баскетбол бла кюреширге онгла да бардыла.
Окъутуу бир сменнге бардырылады. Школчулагъа къошакъ билим бериледи, ала спорт бла кюрешедиле, чыгъармачылыкъ кружоклада юйренедиле, «Точка роста» да барды. Солдатскоеде билим бериу учрежденияда школчуланы битеуроссей олимпиадаларыны муниципал бёлюмю бардырылгъанды, мында район конкурсла бла эришиуле да къураладыла.
КъМР-ни Башчысыны бла Правительствосуну
пресс-службасы.
