Кёлледе  жууунуу кезиуге  хазырланыу къыстау барады. Аны ючюн МЧС-ни регионда бёлюмюню ишчилери суулада  къоркъуусузлукъну жалчытыуну энчи контрольда тутадыла. МЧС-ни КъМР-де Баш управлениясыны бёлюмюню башчысы Амирби Бжахоков билдиргеннге кёре, къырал инспекторла Нальчикде «Экинчи» кёлде адамла аслам санда солурукъ объектледе къоркъуусузлукъну жорукълары къалай толтурулгъанларын тинтгендиле. Ала къутхарыу пунктланы къыйын болумлагъа, батханнга неда ачыгъаннга болушургъа хазырлыкълары не халда болгъанын сюзгендиле, медицина оборудование, къутхарыу амалла (къайыкъла, жилетле, кругла) бла жалчытылыннганларын сурагъандыла, инсан сууда кесин къалай жюрютюрге кереклисине юйретген билдириу къангала, жууунургъа жарамагъан жерлени кёргюзтген белгиле орнатылгъанларына бла къалгъанларына къарагъандыла. Къутхарыучула юйретиулени ётгенлерине, аланы сууда операцияланы бардырыргъа эркинликлери болгъанына бла къалгъанына энчи эс бурулады. 
– Хар инсан кёллени, череклени къатларында сакълыкъны  юсюнден унутмазгъа, низамны бузмазгъа борчлуду. Бютюнда сабийлеге эс бурургъа тийишлиди, балала абаданладан кёргенлерин къатлайдыла, аны себепли  биз ахшы юлгю кёргюзтюрге, жууаплылыгъыбызны унутмазгъа тийишлибиз, - дегенди Амирби Бжахоков.  
Тинтиулени эсеплерине кёре, кёлню солуу кезиуге хазырлыгъына белги салынырыкъды. Суу объектледе бузукълукъла эслеген адамла министерствогъа «ышаныулукъну телефонуна» - 8 (8662) 39-99-99- сёлеширге боллукъдула.
Ведомство кёлледе, черекледе жюзерге сюйгенлени жангызда белгиленнген жерледе жууунургъа чакъырады. Суу уллу кёллюлюкню кечмейди - къоркъуусузлукъну унутмай,  жаныгъызны, саулугъугъузну да сакъларыкъсыз.

Хабибуллахланы Зульфия.