Кадет къымылдауну жайыуну дурус кёргендиле

Бу кюнледе Нальчикни 33-чю номерли орта школунда кадет классланы  «Муратынга ийнан» деген ат бла  республикалы форуму  ётгенди. Ол Къабарты-Малкъарны тарыхында биринчи кере бардырылгъанды. Аны   КъМР-де МВД-ны, КъМР-ни Жарыкъландырыу, илму эмда жаш тёлюню ишлери жаны бла  министерствосу, Студентлени россейли биригиую  къурагъандыла.
Форумчуланы КъМР-де ич ишлени министри Василий Павлов алгъышлагъанды. Ол республикада биринчи кадет класс 2016 жылда 7-чи номерли мектепде ачылгъанын эсгертип, кадет къымылдау кюч ала барлыгъына ийнаннганын билдиргенди. Кадетле башхалагъа  не жаны бла да юлгюлюдюле. Башха тюрлю болур амалы да жокъду – ала бизни формабызны  жюрютедиле. Биз аны бла ёхтемленебиз», – дегенди.
Министр, къыралда бусагъатдагъы болумну юсюнден сагъына,  республиканы жашлары, Ата журтха къуллукъ эте, Украинада энчи аскер  операциягъа  къатышханларын, кишиликлерин, ётгюрлюклерин да кёргюзтгенлерин чертгенди.  «Биз а, мында къуллукъ эте, аланы сабийлери, ата-аналары, жууукълары  тынч-ырахат жашау этерлерин жалчытыргъа борчлубуз», – дегенди. 
Кадетлеге насийхат сёзюн айта, Василий Павлов: «Муратларыгъызгъа жетер ючюн, аладан таймай, алгъа таукел барыргъа керексиз», – деп белгилегенди. 
КъМР-ни Жарыкъландырыу, илму эмда жаш тёлюню ишлери жаны бла  министри Анзор Езаов а «Бюгюн республикада аламат тёре жаратылды – Кадет классланы форуму», – деп,  тарыхны эсге салгъанды: кадет классла Россейде 1732 жылда къуралгъандыла. Алада  фельдмаршалла П.А. Румянцев бла М.И. Кутузов, тенгиз аскерледе къуллукъ эте, атларын айтдыргъан Ф.Ф. Ушаков, П.С. Нахимов, М.П. Лазарев окъугъандыла.
Бизни республикада да бюгюнлюкде 20 классда 360 кадет болгъанын эм юч кадет интернат-школ ишлегенин эсгертгенди министр.  «Алада орта билим бла бирге кадетле  аскер техника бла ишлерге да юйренедиле. Ол а, ала аскер къуллукъну сайласала, алагъа бек  жарарыкъды», – деп къошханды.  
КъМР-де Адамны эркинликлери жаны бла уполномоченный, афган урушну ветераны  Зумакъулланы Борис а кадетлени бюгюн былай кёп болгъанын  кёргенине бек къууаннганын  айтханды. «Сиз махтаулу жолну сайлагъансыз. Ол  ёхтемликни, кишиликни эмда бийик даражаны жолуду», – деп,  кадет къымылдау республикада  кенг жайылыргъа кереклисин чертгенди. «Къабарты-Малкъарны Башчысы Казбек Коков ёсюп келген тёлюню адет-къылыкъгъа, патриот ниетде юйретиуге аслам эс бёлюрге дайым чакъыргъанлай турады. Аны ючюн деп, республикада сабий садла, школла жангыртыладыла, жангылары ишленедиле, кёп проектле жашауда бардырыладыла. Аны айта келгеним, сиз, ёсюп келген тёлю, Ата журтну сюйсегиз, анга кертичи къуллукъ этсегиз, жашау ырахатлы боллукъду. Келир заман сизге кёре боллугъун унутмагъыз», – дегенди.
Форумда  башха жууаплы  къуллукъчула да сёлешгендиле эмда кеслерини насийхат сёзлерин айтхандыла.   КъМР-ни сыйлы артисти, шахар советни депутаты Текуланы Амур а  кадетлени тилеклери бла «Ата-аналагъа баш урайыкъ» деген жырны жырлагъанды. Жыйылгъанла анга сюелип тынгылагъандыла.
Андан сора уа хычыуун жумуш  башланнганды. Иги окъугъан, спортда жетишимле болдургъан, жамауат жашаугъа тири къатышхан школчулагъа бла устазлагъа  КъМР-де ич ишлени  министри грамотала, саугъала да бергенди. Башха ведомстволаны келечилери да кадетлеге къуру къоллары бла келмегендиле.
Форумну ишине дагъыда КъМР-ни Экономика эмда жамауат коркъуусузлукъ жаны бла советини секретары Казбек  Татуев, КъМР-ни министри Залим Кашироков,  КъМР-ни спорт министрини орунбасары Аналаны Аслан,  Санкт-Петербургда энчи  ишле жаны бла тамата следователь подполковник  Альберт Попкоев, кюч структураланы келечилери, ЗАГС-ны, банкланы таматалары, белгили спортчула, школчула, устазла да къатышхандыла.         

Холаланы Марзият.
Суратланы автор алгъанды.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.