Минги тауда «Кинокавказ» деген Шимал-Кавказ жаш тёлю кинофестиваль бошалгъанды. Элбрусда, 3500 метр бийикликде, хорлагъанланы эм лауреатланы саугъалагъандыла. 
Жюриге шорт-листге тюшген 44 фильмден эм ахшыларын сайларгъа керек эди. Алай бла «Эм иги телевидение документли фильм» номинацияда къыргъызлы режиссёр Ильгиз-Шернияз Тунрсунбек улуну «Аламан» деген иши айырылгъанды. Санкт-Петербургдан Иван Батуринни «Родченко» киносу уа лауреат болгъанды. Быйыл жюрини энчи къараууна тийишли фильмни да сайларгъа оноу этилгенди. Бу номинацияда Санкт-Петербургдан Надежда Подберезныхни «Песни Севера» эм Чеченден Асламбек Арипхановну «Без преград» деген ишлери белгиленнгендиле, Асламбекни фильми энчи излемлери болгъан адамланы жашауларын суратлагъаны ючюн дипломгъа тийишли болгъанды. 
Эм иги къысха метражлы оюн фильмге уа Павел Пантинни (Санкт-Петербург) «Я не трус» деген иши саналгъанды. Жюри бу номинацияда Шерзод Назаровну (Узбекистан) «На шелковом пути» фильмине энчи саугъа бергенди. Адамны ич дуниясын къалай къуралгъанын ачыкълагъаны ючюн мында дагъыда Динара Абдрашитованы (Уфа) «Гильза» деген ишине да эс бурулгъанды. 
«Эм ахшы анимация фильм» номинацияда Шокира Холикованы (Узбекистан) «Девушка и облако» киносу хорлагъанды. «Эм иги къысха метражлы анимация фильмде» уа лауреат Дарья Рузанованы (Нижний Новгород) «Холодает» лентасы болгъанды. 
Фестивальда социал роликле да сайланнгандыла, аладан эм игиге  Шамиль Агаевни (Чечен Республика) «Не инвалиды» фильми саналгъанды. Ангелина Битарованы (Шимал Осетия-Алания) «Я здесь» эм Дарья Иванованы (Чуваш Республика) «Зарядка» ишлери лауреатланы къауумуна киргендиле. 
Саугъалауда къыйын сайлауну бардыргъан жюрини  келечилерин да белгилегендиле. Ала, фахмулулукъларыны, бийик усталыкъларыны хайырындан тюз багъа биче, фестивальны айнытыугъа уллу себеплик этедиле. Быйыл къууандырырча дагъыда бир жангычылыкъ болгъанды: фестивальны партнёру, Россейде эм даражалы кинокомпанияладан бири – АМЕДИА киностудия кесини саугъасын хазырлагъанды, анга кёре хорлагъан фильмлени анда алдырыргъа энчи келишим бла сертификат бериледи.
«Кинокавказ» деген жаш тёлю фестиваль ючюнчю кере къуралады, анга къатышыргъа сюйгенлени саны жылдан-жылгъа ёсе барады. Сёз ючюн, 2018 жылда 35 заявка келген эди, 2019 жылда – 170, быйыл а – 17 къыралдан 360-дан аслам иш. Фестивальны Искусстволаны Шимал Кавказ институту (СКГИИ) Россейни Культура министерствосуну болушлугъу эм «Arena one» продюссер къауумну къатышыуу бла ётдюреди. Фестивальны продюссерлери СКГИИ-ни выпускниклери Артем Челикин бла Зарина Ажагоева айтханларыча, быллай башламчылыкъла жаш режиссёрлагъа айнытыу майданладыла, аланы жангы чыгъармачылыкъ бийикликлеге элтген жолладыла.

Кульчаланы Зульфия.