Кёп болмай Битеуроссей халкъ фронтну Къабарты-Малкъарда бёлюмю, #Биз биргебиз жандауурлукъ акцияны чеклеринде, волонтёрла бла бирге Донбассха тоннадан аслам гуманитар болушлукъ ашыргъанды. 
Аны ОНФ-ну штабында бир айдан артыкъ жыяргъа тюшгенди. Хар замандача, ала кёбюсюнде аш-суу эм гигиена керекледиле. Жандауурлукъ акциягъа уллу кёллю болмагъан жерлешлерибиз, организацияла, Тырныауузну 3-чю номерли орта школуну окъуучулары эм башхала да къатышхандыла. 
Жамауатчыла адамла келтирген затланы къагъыт орунлагъа салып жарашдыргъандыла. Алгъаракълада гуманитар болушлукъну бир кесегин «Радуга» социал-реабилитация арада тургъан донбассчы сабийлеге бергендиле. Ала китаплагъа, илляулагъа, татлы-ашарыкъла бла суулагъа эм башха затлагъа да бек къууаннгандыла. 
ОНФ-ну келечилери гуманитар болушлукъну Шимал Осетиядан коллегалары бла бирге Дондагъы Ростов областьда  арагъа жибергендиле. Мында регионладан келтирилген продуктланы бла товарланы къачхынчылыкъны сынаргъа тюшгенлеге эм жашау журтларын къоялмай къыйын болумда жашагъанлагъа юлешедиле. 
- Бу жол Шимал Осетиядан коллегаларыбызгъа къошулуп, Къабарты-Малкъарны атындан бир тоннадан аслам жюк ашыргъанбыз. Бусагъатда бизни республикада да бардыла биринчи керек болгъан товарла бла къытлыкъ сынагъанла. Алагъа да къолубуздан келгенича себеплик этерге борчлубуз. Аны бла байламлы бюгюнлюкде да жыйылыуну тохтатмагъанбыз. Жандауурлукъгъа ким сюйсе да къошулургъа, аш-суу неда кийим келтирирге боллукъду, - дейди ОНФ-ну келечиси Ислам Макоев.

Магометланы 
Сулейман.