Чегем районда Сабий музыка школ жарым ёмюрден аслам заманны жетишимли ишлеп келеди. Ол кезиуге мекямдан хунерли музакантланы кёп тёлюсю чыкъгъанды. Бюгюнлюкде да анга 250-ден аслам сабий жюрюйдю. Ала фортепианода, аккордеонда, къобузда, гитарада бусагъатдагъы эм классика макъамланы согъаргъа, жырларгъа эм тепсерге юйренедиле.
Жыл сайын бу маданият араны келечилери битеуроссей эм халкъла аралы музыка фестивальлада биринчи жерлеге тийишли болмай къалмайдыла. Анга себеплик этген баш шартладан бири уа - мында кёп жылланы жарыкъ бетли ишлей келген сынамлы педагогланы уллу къыйын салгъанларыды. Ала музыкадан бла тепсеуледен сора да, жаш адамланы адет-къылыкъларына да эс бурадыла.
Эсге сала айтсакъ: жер-жерли администрация маданият араны ырысхы-техника мурдорун игилендириуге ахча бёлгенди. Мындан арысында да билим бериу жангы излемлеге эм мардалагъа келиширине дайым эс буруллукъду.
Бизни корр.