Хорламны кюнюне хазырланыуну чеклеринде «Газпром газораспределение Нальчик» компанияны специалистлери Ёмюрлюк оту жаннган 36 эсгертмеге къарап чыкъгъандыла. Бу ишни ала «Газпром межрегионгаз» ООО-ну «Сыйлы борч. Ёмюрледе эсде къалырча» деген битеуроссей акциясыны кезиуюнде тамамлагъандыла.
Специалистле газ оборудованиягъа къарагъандыла, быргъыларын, хар нелерин да тазалагъандыла, от иги жанарча этгендиле. Тёреде болгъаныча, компанияны келечилери кеслери бла гитче газ аппарат келтиредиле. Аны уа нек десегиз, эсгертмени тазалагъан заманда, аны оту ёчюлмезча. «Ёмюрлюк» дегенни магъанасы ма аллай ууакъ затлада окъуна сакъланады.
«Быллай эсгертмелеге къарау – бек жууаплы эм сыйлы ишди. Биз аны жыл сайын тындырабыз. Быйыл да, заманында мадар этип, бу комплекслени Хорламны кюнюне хазырлагъанбыз», – дегенди «Газпром газораспределение Нальчик» компанияны баш инженери Анзор Тутуков.
Улбашланы Мурат хазырлагъанды.