Кёп болмай КъМР-ни Миллет музейине Маданият эм табийгъат байлыкъланы сакълау жаны бла фонд Тёбен Жулат шахарда археология ишлени кезиуюнде табылгъан затланы бергенди. Учрежденияны таматасы Феликс Наков, быллай ишни магъаналыгъын черте, музей жангы экспонатла бла байыкъланнганын уллу къууанчха санагъанды.
Фондха башчылыкъ этген Камбулат Кушхов а алимле жангы археология материалланы хайыры бла жарыкъландырыу эм билдириу кластер къурасала иги боллугъун эсгертгенди. Аны бла бирге келир заманда «Джулат» паркны ЮНЕСКО-ну объектлерини тизмесине къошаргъа мадар этиллигин да айтханды.
Сагъынылгъан фондну келечиси Жуболаны Арсен а 14-чю ёмюрледе жашау къайнагъан Тёбен Жулат алыкъа толу ачыкъланмагъанын белгилегенди. «Биз шахарны археологла эс бурмагъан кесегинде ишлегенбиз. Ол кезиуледе адамла къалай жашагъанларын тинтгенбиз. Аны чеклеринде тёрт мингден аслам зат табылгъанды, – дегенди.
Археолог Игорь Козмийчук Къабарты-Малкъарда иги кесек магъаналы эсгертме болгъанын, алай Тёбен Жулатны аланы барындан да сейирге санаргъа боллугъун эсгертгенди.
– Токъсан гектар жерде орналгъан буруннгулу шахарда тюрлю-тюрлю миллетле жашагъандыла, сатыу-алыу баргъанды, аскерчиле да тургъандыла. Аны 14-чю ёмюрледе, уруш бла келип, Акъсакъ Темир бузгъанда, халкъыны бир кесеги таулагъа къачып къутулгъанды. Биз объектде ишлени кёп болмай башлагъанбыз. Болсада 80 квадрат метр чакълы жерде окъуна 5 500-ден артыкъ зат табылгъанды, – дегенди Игорь Козмийчук.
Магометланы Сулейман.
