Тюнене Правительствону юйюнде  К.В.Коков Къабарты-Малкъар Республикада къыйын болумланы болдурмау эмда аланы кетериу, отдан сакъланыу жаны бла комиссияны жыйылыуун бардыргъанды. Аны ишине КъМР-де баш федерал инспектор Е.А.Ткачев да къатышханды.
МЧС-ни КъМР-де Баш управлениясыны, тийишли министерстволаны бла ведомстволаны, бир-бир муниципал къуралыуланы башчыларына тынгылап, республиканы оноучусу къыйын болумладан сакъланыуну шарт мадарларын этерге кереклисин чертгенди. Суула кётюрюлген кезиуге тынгылы хазырланыугъа энчи эс бурулгъанды.
2019 жылда, деп белгиленнгенди жыйылыуда, суу кётюрюлмезча, уллу хата да салмазча ишлеге, гидротехника сооруженияла бла байламлы жумушлагъа 76 миллион сомдан артыкъ бёлюннгенди. Регионну МЧС-ини шартларына кёре суу басаргъа къоркъуулу тийрелеге он муниципал къуралыуда 63 эл бла шахар саналадыла. Бюгюнлюкде  жагъаланы, суу ызланы бегитиуге, тау жерледе болумгъа башындан дайым къараугъа,  кёпюрлени тюплерин тазалаугъа, ырысхы-техника керекле, табийгъат къыйынлыкъны юсюнден билдирген системала не халда болгъанларын тинтиуге аслам кюч салынады.
Республиканы районларында болгъаныбызда, деп чертгенди Коков,  Урожайное элде,  Александровская бла Котляревская станицалада жашагъанла Терк эмда Черек сууланы жагъалары тутхучсуз болгъанларын жарсып айтхандыла. Чегем чучхурланы тийресинде да аллай къоркъуу барды. Нальчик черекни жагъаларында да бегитилген жерлени бир кесеги да бузулгъанды.
К.В.Коков череклени бла кёллени халларына дайым къарап турургъа, къорууланыу жаны бла ишлеге полициячыланы, башха кюч структураланы, жамауатны да къатышдырыргъа кереклисине эс бургъанды. Хар жерде да экстренный службаланы телефон номерлери бла  щитле салыуну, билдириу ишге  басма органланы да къатышдырыуну дурус кёргенди.
-Мычымай мадар этилир, табийгъат къыйынлыкъ не къадар аз хата жетдирир, адамланы жашаулары бла саулукълары ючюн хар бирибиз да жууаплыбыз. Аны биз бир такъыйкъагъа да унутмазгъа керекбиз. Алгъадан  мадарла этиу – бюгюннгю заманны излемиди. Хауа иги да  тюрленнгени бла байламлы жашау магъаналы объектлеге, экономикагъа бла социал сферагъа хата салыныр деген къоркъуу да кючленеди. Аны, жарсыугъа, республика арт жыллада кеси башында сынагъанды, ырхы келиу, къар юзюлюу, суу басыу, къаты жел уруу, адамла кёп жыйылыучу жерледе от тюшюу дегенча болумланы хаталарын кёргенди, - дегенди регионну оноучусу.
Комиссияны жыйылыуунда от тюшюуню баш сылтаулары  сабанлада къауданны кюйдюрюу, ёртенле къурау болгъаны чертилгенди. Быйыл 11 мартха къургъакъ кырдыкны бла багушну жандырыу кезиуле 213 болгъандыла. От ёчюлтюучюле артыкъда кёп Нальчик, Прохладный шахарлагъа, Урван эмда Май районлагъа чакъырылгъандыла.
КъМР-ни Башчысыны къуллугъун болжаллы халда толтургъан бу айны ахырына къыйын болумла бла байламлы комиссияланы жыйылыуларын республиканы битеу шахарларында бла эллеринде бардырыргъа буйрукъ бергенди.
Жыйылыуну ахырында Къабарты-Малкъарда артыкъда къоркъуулу объектлени 2019 жылгъа жарашдырылгъан тизмеси къабыл кёрюлгенди.