Москвада Къабарты-Малкъарны Башчысыны къуллугъун болжаллы халда толтургъан Казбек Коковну бла «Газпром» ПАО-ну правленини председатели Алексей Миллерни ишчи тюбешиулери болгъанды. Ушакъны кезиуюнде бирге ишлеуню онглары сюзюлгендиле, ол санда газны мотор отлукънуча хайырланыуну кенгертиуню амалларына къаралгъанды. «Газпром» республиканы жеринде кесини газ бла жалчытыучу жерлерин кёбейтиу жаны бла ишни бардыра тургъаны да айтылгъанды.
Бюгюнлюкде  автомобильлени газ бла толтургъан станцияла Прохладныйде (АГНКС) бла Нальчикде (2018 жылда жангыртылгъанды)  ишлеп турадыла. Дагъыда «Газпром» Бахсан шахарда станцияны къурулушун бардырады, Чегем районну Шалушка элинде уа АГНКС-ни проектин жарашдырады.
Тюбешиуню кезиуюнде «Газпром» республиканы газ бла ышаннгылы жалчытханы белгиленнгенди. Аны бла бирге уа газ ючюн хакъ тёленмей жыйышдырылгъан борч 6 миллиард сомдан озгъаны да эсгертилгенди. Алексей Миллер Казбек Коковну эсин ол халны тюзетир мадарла этерге керек болгъанына бургъанды.
Эсгертиу: «Газпромну» бла Къабарты-Малкъар Республиканы Правительствосуну араларында бирге ишлеуню, табийгъат газны мотор отлукънуча не къадар кёп хайырланыуну  юсюнден келишим къабыл этилгенди эмда жашауда бардырылады. Регионну газ бла жалчытыу 96,6 процентни тутады.