8 мартда эрттенликде, хар замандача, Долинскеде Политика репрессиягъа тюшген малкъар халкъны мемориалыны аллында адамла эрттенликде эртте жыйылып башлагъандыла. Кёчгюнчюлюкню азабын сынап, аурууладан, ачдан бла сууукъдан къырылгъан адамланы эсгерирге, алагъа хурмет этерге келгенлени арасында КъМР-ни Башчысыны къуллугъун толтургъан Казбек Коков, Парламентни спикери Татьяна Егорова, премьер-министр Мусукланы Алий, министрле, депутатла, жамауат да бар эдиле.
Бушуулу митингни аллында уа былайда музыкалы-театр оюн кёргюзтюлгенди. «Балкария» тепсеу ансамбльни артистлери Азиягъа бла Къазахстаннган зор бла кёчюрюлген миллет сынагъан къыйынлыкъны тепсеуде кёргюзтгендиле, алайда кёчгюнчюлюк жырла да айтылгъандыла.
КъМР-ни культура министри Мухадин Кумахов адам улуну тарыхында болгъан къыйынлыкъла къайтарылмаз, халкъла айныр ючюн кюйсюзлюкню, зулмулукъну унутургъа жарамагъанын чертгенди. «Бюгюн а биз саулай халкъ сынагъан бушууну эсгеребиз. Быйыл таулу миллет ата журтундан зор бла кёчюрюлгенли 75 жыл толгъанды. Жылла озадыла, жарала селейедиле, алай халкъ тарыхын унутмайды, эсибиз ол къыйын кюнлеге къайтарады. Ол а бизге дерсди, бир бирге сакъ болургъа, хурмет этерге, игиликге чакъырады. Мен былайда къуру тиширыуланы угъай, эр кишилени да бушууларын, жилямукъларын кёреме. Ол а тарыхыбызны биле, эсибизде тута алгъа барыргъа, айныргъа кереклисин белгилейди»,-дегенди ол.
Жыйылгъанла ол къыйынлыкъда къырылгъан халкъны бир минут шумсуз туруп эсгергендиле. Ызы бла КъМР-ни муфтийини орунбасары Мисирланы Хызыр ол зулмулукъда жоюлгъан адамларыбызгъа Аллахдан кечмеклик тилеп, дууа этдиргенди.
Митингден сора Казбек Коков, Татьяна Егорова эм башхала мемориалгъа эмда закий назмучу Мёчюланы Кязимни къабырына гюлле салгъандыла.
Бу бушуулу кюннге уа музейде жангы кёрмюч къурагъанды. Аны методисти Улбашланы Сафиятны бизге айтханына кёре, экспозиция билим бериуге аталгъанды – школдан башлап, бийик профессионал билим бериуге, илмугъа дери.
- Биз бушуулу жумушлагъа хар жыл да тынгылы хазырланыучубуз. Быйыл а профессорларыбызны, РФ-ни, Къабарты-Малкъарны сыйлы устазларыны, миллет проектлеге къатышып, жетишимле болдургъанланы, илмуну айнытыугъа кеслерини юлюшлерин къошханланы юслеринден кёп сейир шартла жыйышдыралгъанбыз, ала къонакъларыбызгъа сейир болурла деп ышанабыз, -дегенди ол.
Ол кюн Курорт залда суратчы Занкишиланы Ибрагимни кёрмючю да ачылгъанды. Анга уа автор тюрлю-тюрлю жыллада жазгъан чыгъармала, ол санда жангылары да, киргендиле. «Къарт нарт», «Чепкен согъуу», «Эски юй», «Орам» дегенча эм башха суратлада уа малкъар элледе кёчгюнчюлюкге дери къаллай тынчлыкъ, сабырлыкъ, ырахатлыкъ болгъанлары, адамла мамыр усталыкъла бла кюрешгенлери, урушну, къыйынлыкъланы, кёчгюнчюлюкню юслеринден сагъыш окъуна этмегенлери кёрюнюп турады.
КъМР-ни миллет музейини ишчиси Гуталаны Марина бизге билдиргенине кёре, суратланы автор кеси сайлагъанды, кёрмючге 50 иш киргенди. Кинону сюйгенлеге уа ол кюн «Дорога на край жизни» деген художестволу фильм да кёргюзтюлгенди.
Малкъар халкъ зор бла кёчюрюлгенине аталгъан бушуулу жумушла республиканы районларында да бардырылгъандыла.
Тикаланы Фатима.
Суратланы Холаланы Марзият алгъанды.
