«Единая Россия» политика партия  жанлыланы регион координация советини кезиулю жыйылыуунда Россейде пенсия системада бардырылгъан жангычылыкъланы сылтаулары бла муратлары    сюзюлгендиле. Тюбешиу партияны регион бёлюмюнде бардырылгъанды. Аны ишине клубну келечилери бла бирге РФ-ни Къырал Думасыны депутаты Ирина Марьяш да къатышханды.

 

Бу магъаналы сорууну сюзерден алгъа уа къыралда пенсия системада жангылыкъла не сылтау бла бардырылгъанларыны юсюнден къысха презентация этилгенди. Былайда сёз пенсиягъа чыгъаргъа жарагъан жыл санны тиширыулагъа 63, эр кишилеге уа 65 жылгъа дери созууну юсюнден барады.

 

Координация советни башчысы, КъМР-ни Парламентини депутаты Ольга Коротких белгили этгенича, бюгюнлюкде къыралда ишчи жыл санда халкъ иги да азайгъанды – 97 миллиондан 76 миллионнга дери. Озгъан ёмюрню 70-чи жылларында 3,7 уруннган адамгъа бир пенсиячы жетген эсе, бюгюнлюкде уа бу ёлчем тюрленнгенди, ишлеген адамгъа ауурлукъ уллу болгъанды. 

 

Бюгюнлюкде къыралда  146, 9 миллион адам жашайды, аладан 46,5 миллиону пенсиячыладыла. Аладан а бек аздан 26,4 проценти пенсия да алып, андан ары ишлейдиле. «Солуугъа чыкъгъандан сора жамауатны жартысы бир ненча жылны энтта ишге жюрюп турадыла – 55 жыллары толгъан тиширыула юйде тохтап къалмайдыла. Сёз ючюн, былтыр   пенсиягъа 1,4 миллион адам чыкъгъанды, аладан 0,73 миллиону андан ары урунадыла»,-дегенди ол.

 

Системада жангычылыкъла дагъыда къыралда адамны жашау ёмюрю узайгъаны бла да байламлыды. Тиширыугъа 55 жылда, эр кишиге уа 60 жылда пенсиягъа чыгъаргъа жарагъаныны юсюнден закон озгъан ёмюрню 30-чу жылларында чыгъарылгъан эди, ол кезиуде  уа адамны жашау ёмюрю 40-47 жыл болгъанды. Бюгюнлюкде уа ол 72,4 жылгъа жетеди, мындан ары  энтта ёсериги белгиленеди Ирина Марьяш а Къырал Думада  пенсия системада жангычылыкъла бла байламлы къаллай жумушла толтурулгъанларыны юсюнден билдиргенди. «Реформа адамларыбызны къолайлы  жашауларын жалчытыр ючюн бардырылады. Парламентде Правительство кёргюзтген бегим битеу площадкалада сюзюледи, шёндю бизни баш борчубуз, жангычылыкъланы юслеринден сорууланы жыйышдырып, алагъа жууапла табаргъа, бу иш не мурат бла бардырылгъанын ангылатыргъады»,-дегенди ол.

Бюгюнлюкде Ирина Марьяш  айырыучула бла тюбешиуле бардыргъанды, аланы кезиуюнде адамланы соруулары кёп эселе да, аланы асламы пенсия система алышыныргъа, жангычылыкъла кийирилирге керек болгъанын ангылайдыла, деп белгилегенди. «Реформагъа ачыкъ къажау тургъанла жокъдула, ол а бек магъаналыды»,-деп къошханды депутат.

Ирина Евгеньевна пенсия системада бардырылгъан тюрлениулени сылтауларын, энчиликлерин да ангылатханды. Ала къыралда ишлерге жараулу жыл санда халкъны саны азайгъаны, пенсиячыла уа кёбейгенлери бла байламлыдыла. Пенсиягъа чыгъаргъа жарагъан жыл сан созулмаса, пенсияны ёлчемин къысхартыргъа тюшерикди.

 Къырал Думагъа берилген законопроектге тийишлиликде уа, келир жылдан башлап, пенсиягъа чыгъаргъа жарагъан жыл саннга бир жыл къошулуп барлыкъды. Алай бла   эр кишилеге аны 65 жылгъа,  тиширыулагъа уа  63 жылгъа дери кёбейтирге белгиленеди.  Бу тюрлениуле уа Къырал Думада социально-урунуу даулашланы кетериу жаны бла юч жанлы комиссияны жыйылыуунда да сюзюлгендиле.
Айырыучула бла тюбешиуледе уа асламында пенсия льготаланы, жангычылыкъла ишсизликни кёбейтирге боллугъуну бла къаллыгъыны, тиширыулагъа пенсиягъа чыгъар заман 8 жылгъа нек кёбейтилгенини юслеринден соруучудула, деп чертгенди депутат. «Биз  ангылатыу ишни тирилтирге борчлубуз»,-деп къошханды. 

КъМР-ни организацияларыны профсоюзларыны биригиулерини башчысы Фатимат Амшокова да къатышханды жыйылыугъа. Ол къыралда профсоюзла бу жангычылыкълагъа къажау болгъанларын билдиргенди. «Биринчиден, аланы толтурургъа заман аз берилгенди. Профсоюзла Къырал Думада  ишчи къауум къураргъа кереклиси жанлыды. Ол  а реформаны бардыргъанда, ишлеген адамланы сейирлерин сакъларгъа борчлуду.

Хау, пенсия системаны жангыртыргъа керекди, алай аны терен сагъыш этип, битеу амалланы сюзюп, алай жангыртыргъа тийишлиди. Ишлеген адам жарлы болгъаны терсди»,-дегенди ол эмда профсоюз организацияла хазырлагъан предложенияланы Ирина Марьяшха бергенди.
Пенсия системада жангычылыкъланы юслеринден кеслерини оюмларын Уллу Ата журт урушну, урунууну, Сауутланнган кючлени, ветеранларыны Нальчик шахар советини башчысы Абдуллаланы Мустафа, РФ-ни Пенсия фондуну КъМР-де Управлениясыны башчысыны орунбасары Зарема Дикинова, билим бериу эм илму системада ишлегенлени профсоюзларыны башчысы Сергей Карныш эм башхала да билдиргендиле. Сёлешгенле пенсияны ёсдюрюрге, ишлеген адам къолайлы болургъа кереклисини юслеринден айтхандыла эмда бардырылгъан реформаны ангылатыргъа тийишли болгъанын чертгендиле.

Жыйылыуда  башхала да сёлешгендиле, анга «Единая Россия» политика партияны регион бёлюмюню толтуруучу комитетини башчысы Дмитрий Парафилов, «ЖКХ-да жамауат контроль жаны бла регион ара» организацияны башчысы Руслан Мазлоев эм башхала да къатышхандыла.