Жашауда тийишли жерле табаргъа болушурукъ дипломла алгъандылаНальчикде Жашил театрда озгъан байрым кюн Х.М.Бербеков атлы Къабарты-Малкъар къырал университетни айырмалы бошагъан жаш адамлагъа къызыл дипломла бериуге жораланнган къууанчлы ингир быйыл онбиринчи кере бардырылгъанды.
Жауун жауа, тохтай да тургъанына къарамай, Мекямда олтурур, сюелир жер да жокъ эди. Жаш адамланы жетишимлери бла алгъышларгъа КъМР-ни Парламентини Председателини орунбасары Жанатайланы Салим, КъМР-ни Правительствосуну Председателини орунбасары Мурат Карданов, Билим бериуню качествосуна мониторинг этген институтну профессору Виктор Болотов, «КъМР-ни Бирикген профсоюз организациялары» союзну председатели Фатимат Амшокова, жаш адамланы ата-аналары, жууукълары, шуёхлары да келген эдиле.
Ингирни бардыргъанла Денис Васильченко, Гульнара Жибилова, Жамал Теунов эмда Ирина Хагажеева, КъМКъУ-ну озгъан окъуу жылда жетишимлерини юсюнден ёхтемлик бла айта, ол къыралда жюз бек иги окъуу юйлени санына киргенин да чертгендиле. Илмуда, спортда, башха жаны бла да айырмалы болгъан студентлени атларын белгилегендиле. Ызы бла ала сахнагъа Мурат Кардановну, Виктор Болотовну, Фатимат Амшокованы чакъыргъандыла.
Мурат Наусбиевич республиканы Правительствосуну Председатели Мусукланы Алийни атындан письмону окъугъанды. Анда жаш адамланы республиканы кёп предприятияларында бла организацияларында сакълагъанларыны эмда алгъан билимлерин ала жашауда хайырланырча онгла болгъанларыны юсюнден да айтыла эди.
Поделиться: ЧИТАТЬ ТАКЖЕ:
|