Россей Федерацияны урунуу эмда социал къоруулау министри Максим Топилин Къабарты-Малкъаргъа эки кюннге къырал жумуш бла келген эди. КъМР-ни Башчысыны къуллугъун болжаллы халда толтургъан Казбек Коков, Урунуу эмда иш бла жалчытыу жаны бла федерал службаны таматасы Всеволод Вуколов, КъМР-де баш федерал инспектор Евгений Ткачёв бла бирге ол республикада бир-бир  социал объектледе болгъанды – КъМР-де Медицина-социал экспертизаны баш бюросун бла  Яникойда республикалы психоневрология интернатны жокълагъанды.
Регионда болгъан кезиуде федерал министр кенгешле бардыргъанды. Алада «Демография» миллет проектге кёре салыннган борчла къалай  толтурулгъанларына къаралгъанды, РФ-ни  СКФО-гъа кирген  субъектлерини социал сфераларын бла экономикаларын 2024 жылгъа дери  айнытыуну миллет муратларына жетиуню, ол санда халкъны къолайлыгъын кётюрюуню, жарлылыкъны азайтыуну амаллары сюзюлгендиле.